సర్గ 1
88
వానరేంద్రునకు వలసిన సాయము
చేయకున్ననే నీ యవసరమున,
చెప్పుకోతగిన శిష్టులెల్ల నిం
దింతురు న న్నవీధేయుడ నంచును.
89
ఇక్ష్వాకుల కులహిమకరుం డయిన
సగర నృపాలుడు సాకెను నను మును,
ఇక్ష్వాకుల కతి హితుడగు నీతడు
ఇంత కష్టపడ నీయరా దిపుడు.
90
కావున నీతడు గాసి తీర్చుకొను
వీలు పన్నుటయె విధి నాకిప్పుడు,
ఇంచుకంత విరమించిన సుఖముగ
పోవచ్చును తన భావికార్యమున.
91
ఇట్లు మదిని ఊహించి సముద్రుడు,
అడుగు మట్టమున అణగియున్న మై
నాకు హిరణ్మయు, నగ సత్తముతో
వలికె తన మనోభావ మచ్చువడ .
92
పాతాళ భువన వాసులు దైత్యులు
ఉర్వివయికి రాకుండ సురేంద్రుడు,
అలవిగాని యొక అడ్డగోడగా
నిక్షేపించెను నిన్నచ్చట మును.
93
జాత బలిష్ఠులు దైతేయులు క్ర
మ్మఱ పరాక్రమము కెరల లేచి పా
తాళ ద్వారము బాటవచ్చినపు,
డడ్డగడియవై ఆపుచు వారిని.
