సర్గ 20
24
చవిచూడుము భక్ష్యములు భోజ్యములు,
చెఱుకుపాలు దోసిళ్ళను త్రాగుము,
అనుభవించుము సమస్త భోగములు,
దానము చేయుము ధనమును భూములు.
క్రీడించుము నాతోడ యథేచ్చగ,
ఆజ్ఞాపించుము అధికారముతో,
ప్రియసతివై విహరింపగ నాతో
అభినందింతురు ఆప్తులు బంధులు.
25
చూడుమీవు మంజులగాత్రీ ! మా
మకసమృద్ధ సంపదను యశస్సును,
నారలు కట్టి వనంబుల త్రిమ్మరు
రామునితో నీకేమి కార్యమిక.
26
సిరిసంపదలు త్యజింపగ , జయకాం
క్షలు కడముట్టగ, కానల జటియై
కటికనేల పడకల పవళించుచు,
ఉన్నాడో లేడో అతడిప్పుడు.
27
ముందల కొంగలు క్రందుకొనగ, న
ల్లని మబ్బులు కప్పిన పున్నమ వె
న్నెల చందంబున నిన్ను చూడలే
డెందును రాముడు కుందసుగంధీ !
28
నా కైవసమయిన నిను రాఘవుడు
కై కొనజాలడు క్రమ్మఱ కామిని !
మును పింద్రుని కరముల చిక్కిన హి
రణ్యకశిపుని అగణ్య కీర్తివలె.