సర్గ 9
23
మంచి ముత్యముల మాలలు, పచ్చి ప
గడముల గుత్తులు, కలిసిమెలిసి జీ
ఱాడగ, వెండియు పైడియుకలిపిన
నిలువు కంబము లనేకము లగపడె.
24
హెచ్చులు తగ్గులు నించుక లేక , మ
హోన్నతములుగా ఒప్పుచున్న, ఆ
కంబంబులు బంగరు ఱెక్కలతో
అగపడె మింటికి ఎగయ నున్నటుల.
25
రావణు రాజసభావరణంబున
రత్నకంబళి పఱచి, రది; పృథివీ
లక్షణాంకితములగు రాష్ట్ర గృహం
బుల గుర్తులతో పొలిచె భూమివలె.
26
బలిసిన పక్షులు పిలపిలనాడగ,
దివ్యగంధముల తియ్యము సుడియగ,
మంచిరత్నకంబళ్ళతోడ రా
వణుడున్న శుభాంగణ మింపెసగెను.
27
అగరు ధూపములు ఎగువకెగయ, కల
హంసల చాయల నమల ధవళమై,
పూజించిన పూవులతో నగపడె
కామ ధేను వట కన్న లేగవలె.
28
మనసోత్సాహము నినుమడించుచు, ప్ర
సన్న వర్ణముల కన్నుల తనుపుచు,
శోకతాప మార్చుచు, సమకూర్చును
సిరిసంపదలను శ్రీ దేవతవలె.
