ఈ పుట ఆమోదించబడ్డది
ఆ ప్రశాంత విశాంతమునందు, వాని
యుల్ల మువ్విళులూరించు నూహ లెవియొ ?
తనదు జనకుని చిఱునవ్వొ, అనుఁగుజనని
కౌఁగిలింతయొ, ప్రభుని క్రేఁగంటిచూపొ ?
గౌతమీ పూతసలిలావగాహనంబొ ?
విమల కృష్ణాసరిత్తీర విహరణంబొ ?
కేళికోద్యానవనతటీ క్రీడనంబొ ?
ఏమి తల పోయుచుండెనో యెవని కెఱుక ?
ఉన్నయటు లుండి, అక్కటా! యోధుఁ డట్టె
నిట్టనిలువున మ్రాన్పడి నిలిచె నేమి ?
పొదలమాటున నడుగు చప్పుడుల వినెన ?
దవుల నెవ్వియొ గుసగుసధ్వనుల వినెన ?
అడుగుసడి గాదు, పెనుగాలి యగ్గలించి
గుమురులై యున్న యాకుజొంపములు వీవ
అటమటించేడు రెమ్మల తటపట లవి ;
గుసగుసలు గావు, పాముల బుసబుస లవి.
19
