ఈ పుట ఆమోదించబడ్డది
మగుడ ముందున కాతండు మొగము త్రిప్పె,
ముందు వెనుకకు, వెనుకకు ముందు కిట్లు,
తేపతేపకు దిన మెల్లఁ ద్రిప్పెఁ గాని,
పిలక యెప్పటితీరున వ్రేలె వెనుక.
సారెసారెకు కుమ్మరిసారెరీతి
తలను గిరిగిర మంచు నాతండు త్రిప్పె;
ఎన్నిసారులు త్రిప్పిన యేనిఁ గాని,
పిలక యెప్పటిచొప్పున వ్రేలె వెనుక.
ఏటిచిత్రమొ కాని - ఆనాఁటఁగోలె
బొంగరమురీతి నాతనిబుఱ్ఱ తిరిగె;
ఎట్టు లేరీతి తిరిగిన యేనిఁగాని..
పిలక యెప్పటిచొప్పున వ్రేలె వెనుక.
