పుట:బ్రహ్మోత్తరఖండము (శ్రీధరమల్లె వేంకటరామార్యుఁడు).pdf/67

60

బ్రహ్మోత్తరఖండము

సీ.⁠

బంధుమిత్రజ్ఞాతిపతివివర్జితురాల          ననుఁ బ్రోవరయ్య యోమనుజులార కూడునన్నము లేని కులహీనురాలను          ననుఁ బ్రోవరయ్య యోమనుజులార కట్టవస్త్రము లేని కష్టజీవనురాల          ననుఁ బ్రోవరయ్య యో మనుజులార దుర్గంధదూషితదుష్టవిగ్రహురాల          ననుఁ బ్రోవరయ్య యో మనుజులార

⁠

ఆ.⁠

భోగశూన్యురాల రోగపీడితురాల నన్నుఁ బ్రోవరయ్య నాథులార దిక్కుమాలినట్టి బక్కమానవురాలఁ గరుణ చేయరయ్య సరసులార.

⁠ 68

చ.⁠

పురహరుపాదపద్మములఁ బూజ యొనర్చినదానఁ గా నుమే శ్వరుని దినంబులందు నుపవాసము సల్పినదానఁ గాను శం కరుమహనీయలింగములఁ గన్నులఁజూచినదానఁ గా నయో నరవరులార నన్ను విడనాడక యన్నముఁ బెట్టి కావరే.

⁠ 69

సీ.⁠

శ్రీపార్వతీనాథుఁ జింతింపనేరని          దౌర్భాగ్యురాల నోధన్యులార పంచాక్షరీమంత్రపఠనం బొనర్పని          పాపాత్మురాల నోభవ్యులార చంద్రశేఖరకథాశ్రవణవర్జిత నైన          దారిద్ర్యురాల నోధీరులార రజితాద్రినిలయుని భజనంబు సేయని          భిక్షుకురాల నోదక్షులార

⁠