పుట:బ్రహ్మోత్తరఖండము (శ్రీధరమల్లె వేంకటరామార్యుఁడు).pdf/131

124

బ్రహ్మోత్తరఖండము

తే.⁠

వైభవము మీఱఁ బదివేలవత్సరంబు లధికకల్యాణసౌఖ్యంబు లనుభవించి యంత కిన్నరయక్షవిద్యాధరాది సేవ్య మగుశివపదమును జేరఁగలవు.

⁠ 375

క.⁠

అని పలుకుచు గంధర్వుఁడు తనపుత్త్రిక నొసఁగి రాజతనయునకును ద ద్వనమధ్యమున వివాహం బొనరించె యథోక్తవిధి మహోత్సవ మెసఁగన్.

⁠ 376

వ.⁠

ఇవ్విధంబున గంధర్వనాయకుం డారాజనందనునకుఁ బర మోత్సవంబుగా నిజతనూజం బాణిగ్రహణంబు సేయించి పారిబర్హంబుగాఁ గనకరత్నమయంబు లైన యమేయ దివ్యాంబరాభరణంబులును భాసమానంబులగు ముక్తాహారం బులును చంద్రసన్నిభం బైనశిరోరత్నంబును దశసహస్ర భద్రగజంబులును నీలవర్ణంబు లైనతురంగనియుతంబులును అనేకసహస్రసంఖ్యాతంబు లైనకాంచనస్యందనంబులును మఱియు నొక్కదివ్యరథంబును దివ్యకార్ముకంబును దివ్యాస్త్ర మంత్రప్రయోగోపసంహారంబులును అక్షయసాయకంబు లును దూణీరయుగళములును అభ్యేదం బయినధర్మ వర్మంబును శత్రుమర్దనం బైనఖడ్గంబును అమోఘం బయిన శక్తియును దుహితృపరిచర్యార్థంబుగా దాసీజన సహస్రంబు నొసంగిన నారాజకుమారుండు మహదైశ్వర్య సంపన్నుండై నిజభార్యాసమేతంబుగాఁ బరమానందంబునుం జెందియుండె నంత నాగంధర్వుండు నాదంపతుల వీడ్కొని విమానారూఢుం డై క్రమ్మఱ నిజలోకంబునకుం జనియె

⁠