పుట:బ్రహ్మోత్తరఖండము (శ్రీధరమల్లె వేంకటరామార్యుఁడు).pdf/101

94

బ్రహ్మోత్తరఖండము

క.⁠

గోపికయు వెఱఁగు నొందుచు భూపాలునికడకుఁ జేరి పురహరభవన వ్యాపారము నిజతనయా లాపంబులు విన్నవించె లాలితఫణితిన్.

⁠ 229

సీ.⁠

ఆవార్త విన్నంత యాశ్చర్యమును జెంది          శంభుపూజామహోత్సవము విడిచి శీఘ్రంబుగాఁ జంద్రసేనమహారాజు          పరివారసహితుఁడై యరుగుదెంచి దివ్యమాణిక్యదేదీప్యమానంబైన         యంబికారమణుదేవాలయంబు నందుఁ గాంచనమయం బగురత్నవేదికా        స్థలమునఁ బీఠమధ్యమున వెలసి

⁠

తే.⁠

బాలభానుస్ఫురత్కాంతి పరిఢవిల్ల నఖిలజనచిత్తలోచనాహ్లాద మగుచుఁ బూర్ణవిభవాభిరామ మపూర్వమైన కనకమణిమయదివ్యలింగంబుఁ గాంచె.

⁠ 230

క.⁠

దాని విని పౌరులందఱు మానుగఁ జనుదెంచి హర్షమగ్నాత్మకులై యానూతనశివలింగము నానిశి వీక్షించి రద్భుతాదృతమతులై.

⁠ 231

తే.⁠

ఇట్లు వీక్షించి సాష్టాంగ మెరఁగి భక్తి పూర్వకంబుగ నభిషేకములను బిల్వ పూజనంబులు కీర్తనంబులును జేయు చుండి రారేయి భూపాలయుక్తముగను.

⁠ 232