మన్మథదూషణ
శ్రీనాథుఁడు – నైషధము [2-138]
| సీ. |
భువనమోహనసముద్భవమైన యఘమున
నశరీరభూతంబవైతి మదన!
విరహమాలిన్యదుర్విధుఁ గాని సోకవు
కలిదోషమవె నీవు కాయజుండ
ప్రాల్గల రతిదేవి భాగ్యసంపదఁ గదా
ప్రసవసాయక! చచ్చి బ్రతికి తీవు
చాలదా యేలెదు సకలప్రపంచంబు
పంచత్వ మొందియుఁ బంచబాణ!
|
|
| తే. |
తమ్మిపూఁజూలి నీయాగ్రహ మ్మెఱింగి
లోక మవ్యాకులతఁ బొందుఁగాక యనుచుఁ
దక్కుఁగల కైదువులు మాని దర్పకుండు
విరులు నీ కాయుధములు గావించినాఁడు.
| 124
|
చంద్రదూషణ
[శ్రీనాథుని శృంగార]నైషధము [2-128]
| సీ. |
జన్మకాలమునందు జలరాశికుక్షిలోఁ
దరికొండ పొరిపోవఁ దాఁకెనేని
గ్రహణవేళలయందు రాహు వాహారించి
తృప్తిమై గఱ్ఱునఁ ద్రేఁచెనేని
విషమనేత్రుఁడు చేతి విష మారగించుచోఁ
బ్రతిపాకముగఁ జేసి త్రాగెనేని
నపరపక్షము పేరి యపమృత్యుదేవత
యొకమాఱుగా నామ ముడిపెనేని
|
|
| తే. |
కుంభసంభవుఁ డబ్ధితోఁ గూడఁ గ్రోలి
తజ్జలముతోడ వెడలింపఁ దలఁపఁడేని
విరహిజను లింత పడుదురే వీనిచేత?
నక్కటా దైవ మటు సేయఁదయ్యెఁ గాక.
| 125
|
