ఈ పుట అచ్చుదిద్దబడ్డది
రేకు: 0196-04 లలిత సం: 02-495 వైష్ణవ భక్తి
పల్లవి:
చిరకాలధర్మములు చివుకు దవ్వఁగఁబోతే
హరిమఱుఁగు చొచ్చితి మాతఁడే రక్షించెను
చ. 1:
భువిఁ దొల్లి లేరా పుణ్యము సేసినవారు
జవళిశాస్త్రములెల్లాఁ జదివినవారు లేరా
దివి కెక్కి దేవతలై తేరినవారు లేరా
యివల నే మివి సేసి యెవ్వరిఁ బోలేము
చ. 2:
తగఁ దొల్లి వినమా తపము సేసినవారి
జిగి నన్నియజ్ఞములు సేసినవారి వినమా
మిగులా సిద్దివడసి మించినవారి వినమా
యెగువ నే మింతకంటే యెక్కుడు సేసేమా
చ. 3:
పెక్కుమతములు చూచి బెండుపడ్డవారు లేరా
పక్కన నన్నివిద్యలాఁ బరగినవారు లేరా
వోక్కఁడే శ్రీవేంకటేశుఁ డుల్లములో నుండఁగాను
యెక్కుడితనిఁ గొలువ కెవ్వరిఁ బోలేము