ఈ పుట అచ్చుదిద్దబడ్డది
రేకు: 0192-03 సాళంగనాట సం: 02-470 దశావతారములు
పల్లవి:
కంటిరా వింటిరా కమలనాభుని శక్తి
వొంటి నితని శరణ మొకటే వుపాయము
చ. 1:
యీతని నాభిఁ బొడమె యెక్కువైన బ్రహ్మయు
యీతఁడే రక్షించినాఁడు యింద్రాదుల
యీతఁడాకుమీఁద దేలె నేకార్ణవమునాఁడు
యీతఁడే పో హరి మనకిందరికి దైవము
చ. 2:
యీతడే యసురబాధ లిన్నియుఁ బరిహరించె-
నీతని మూఁడడుగులే యీ లోకాలు
యీతఁడే మూలమంటే నేతెంచి కరిఁ గాచె
నీతనికంటే వేల్పు లిఁక మరి కలరా
చ. 3:
యీతఁడే వైకుంఠనాథుఁ దీతఁడే రమానాథుఁ-
డీతఁడే వేదోక్తదైవ మిన్నిటాఁ దానె
యీతఁడే అంతర్యామి యీ చరాచరములకు
నీతఁడే శ్రీవేంకటేశుఁ డిహపరధనము
