ఈ పుట అచ్చుదిద్దబడ్డది
రేకు: 0191-04 బౌళి సం: 02-465 అధ్యాత్మ
పల్లవి:
ఎఱుఁగుటకంటే నెఱఁగమే మేలు
మఱి తెలివికంటే మఱుపే శుభము
చ. 1:
లంపటా లెఱఁగము లవలవ లెఱఁగము
పంపుల బాల్యమే పరిణామము
యింపులు నెఱఁగము యెగ్గులు నెఱఁగము
జంపుల నిదురే సకలసౌఖ్యము
చ. 2:
ఆస లివెఱఁగము అలమట లెఱఁగము
మూసిన గర్భమే మును సుఖము
వాసులు నెఱఁగము వంతులు నెఱఁగము
వేసట పుట్టని విధమే సుఖము
చ. 3:
పాపము లెఱఁగము బంధము లెఱఁగము
శ్రీపతి దాస్యమే శేఖరము
యేపున శ్రీవేంకటేశ్వరు శరణమే
తీపులు మఱపేటి దివ్యానందము