ఈ పుట అచ్చుదిద్దబడ్డది
రేకు: 0190-06 సాళంగనాట సం: 02-461 శరణాగతి
పల్లవి:
ఇహమెట్టో పరమెట్టో ఇఁక నాకు
సహజమై హరియే శరణము నాకు
చ. 1:
చిత్తమిది యొకటే చింత వేవేల సంఖ్య
పొత్తుల హరిఁ దలఁచఁ బొద్దులేదు
జొత్తుల కన్నులు రెండు చూపులైతే ననంతాలు
తత్తరించి హరిరూపు దగ్గరి చూడలేదు
చ. 2:
చేతు లివియు రెండే చేష్టలు లక్షోపలక్ష
యీతల హరిఁ బూజించ నిచ్చ లేదు
జాతి నాలిక వొకటే చవులు కోటానఁగోటి
రీతి హరినామ ముచ్చరించ వేళ లేదు
చ. 3:
వీనులివి రెండే వినికి కొలదిఁలేదు
వూని హరిభక్తి విన బుద్ధిలేదు
యీనటన శ్రీవేంకటేశుఁడిటు చూచినను
తానే యేలె నిఁకఁ దడఁబాటు లేదు
