ఈ పుట అచ్చుదిద్దబడ్డది
రేకు: 0190-05 బౌళి సం: 02-460 అధ్యాత్మ
పల్లవి:
అన్నిటా శాంతుఁడైతే హరిదాసుఁడు దానే
సన్నుతిఁ దానేపో సర్వదేవమయుఁడు
చ. 1:
అత్తల మనసు యింద్రియాధీనమైతేను
చిత్తజుఁడనెడివాఁడు జీవుఁడు దానే
కొత్తగాఁ దనమనసే కోపాన కాధీనమైతే
తత్తరపు రుద్రుఁడునుఁ దానే తానే
చ. 2:
భావము వుద్యోగముల ప్రపంచాధీనమైతే
జీవుఁడు బ్రహ్మాంశమై చెలఁగుఁ దానే
కావిరి రేయిఁబగలు కన్నుల కాధీనమైతే
ఆవలఁ జంద్రసూర్యాత్మకుఁడు దానే
చ. 3:
కోరికఁ దనబ్రదుకు గురువాక్యాధీనమైతే
మోరతోపులేని నిత్యముక్తుఁడు దానే
ఆరయ శ్రీవేంకటేశుఁ డాతుమ ఆధీనమైతే
ధారుణిలో దివ్యయోగి తానే తానే
