ఈ పుట అచ్చుదిద్దబడ్డది
రేకు: 0190-01 లలిత సం: 02-456 వేంకటగానం
పల్లవి:
ఎట్టు వలసినఁ జేయు మిన్నియు నీచిత్తమె
నెట్టన(నె?) నొకఁడనా నీవే యింతాను
చ. 1:
వేవేలు నీకు విన్నవించేదేమి తొల్లే
సావధానముగ సర్వసాక్షివి నీవు
ఆవల నాకిటు సేయుమని చెప్పేదేమి నేను
దైవికమైనట్టి స్వతంత్రుఁడవు నీవు
చ. 2:
తగిలి నిన్ను నాలో ధ్యానించేదేమి తొల్లె
జగతి నీవు పూర్ణచైతన్యుఁడవు
జిగి నీనామము నోరఁ జిక్కించి నుడిగేదేమి
మగుడి శబ్దాక్షరమంత్రరూపుఁడవు
చ. 3:
చేవమీర సిరులఁ బూజించేదేమి నిన్ను
శ్రీవేంకటేశ నీవు శ్రీపతివి
దేవదేవ నిన్ను నీవే తేఁకువెల్లా నెంచుకొని
కావుము నీవొక్కఁడవే కరుణానిధివి
