ఈ పుట అచ్చుదిద్దబడ్డది
రేకు: 0184-03 సామంతం సం: 02-423 శరణాగతి
పల్లవి:
నారాయణాచ్యుతానంత గోవింద హరి
సారముగ నీకు నే శరణంటినే
చ. 1:
చలవయును వేఁడియును సటలసంసారంబు
తొలఁకు సుఖ మొకవేళ దుఃఖ మొకవేళ
ఫలము లివె యీరెండుఁ బాపములు పుణ్యములు
పులుసుఁ దీపునుఁ గలపి భుజియించినట్లు
చ. 2:
పగలురాత్రులరీతి బహుజన్మమరణాలు
తగుమేను పొడచూపు తనుఁ దానె తొలఁగు
నగియించు నొకవేళ నలఁగించు నొకవేళ
వొగరుఁ గారపువిడె ముబ్బించినట్లు
చ. 3:
ఇహముఁ బరమునువలెనె యెదిటికల్లయు నిజము
విహరించు భ్రాంతియును విభ్రాంతియును మతిని
సహజ శ్రీవేంకటేశ్వర నన్నుఁ గరుణించి
బహువిధంబుల నన్నుఁ బాలించవే