ఈ పుట అచ్చుదిద్దబడ్డది
రేకు: 0183-04 లలిత సం: 02-418 అధ్యాత్మ
పల్లవి:
వీదిలోన నదేకదే విష్ణుపదము
ఆదెసనే పాయకుండు నాధిమూలము
చ. 1:
చూచేటి చూపులకును సూటియైన మొదలేదో
యేచి వినుకలిమర్మ మెందు దాఁకీనో
వాచవిచవులు చూచే వంటశాల చోటేదో
ఆచాయనే వుండు నాదిమూలము
చ. 2:
పూఁప తలపోఁతలకు పుట్టినయి ల్లది యేదో
పైపై నూర్పులు నిలువఁగఁ జోటేదో
మాపులు నిద్రించువేళ మరచేటి చోటేదో
ఆపొరుగుననే వుండు నాదిమూలము
చ. 3:
నేరిచిన విద్యలెల్లా నించి దాఁచేచోటేదో
కోరని యానందముకొన యేదో
ఆరయ శ్రీవేంకటేశుఁ డాడనే పాయక వుండు
ఆరితేరి నాతఁడీతఁ డాదిమూలము