ఈ పుట ఆమోదించబడ్డది
రేకు: 0159-01 పాడి సం: 02-281 వైరాగ్య చింత
పల్లవి: చంచలపడఁగవద్దు సారె సారెఁ గోరవద్దు
పొంచుకున్న దైవమే బుద్ధులు నేర్పిరి
చ. 1: లోకరక్షకుఁడు నాలోననే వున్నాఁడిదే
నాకు నభయములిచ్చి నన్నుఁ గాచును
శ్రీకాంతుఁడీతఁడే నాచిత్తములో మలసీని
దాకొని శుభములెల్లాఁ దానే వొసఁగును
చ. 2: పరమపురుషుడు నాప్రాణనాథుఁడైనాఁడు
పరగ నాపాలివాఁడై బ్రదికించును
ధరణీశుఁ డీతఁడే నాదాపుదండై కడఁగీని
నిరతి నేపొద్దును మన్నించును మమ్మెపుడు
చ. 3: శ్రీవేంకటేశుఁడు నాజిహ్వఁ దగిలి వున్నాఁడు
పావనునిఁ జేసి నాకు ఫల మిచ్చును
గోవిందుఁ డీస్వామి నన్నుఁ గొలిపించుకొన్నవాఁడు
యీవల నావల నాకు నిహపరా లిచ్చును
