ఈ పుట ఆమోదించబడ్డది
రేకు: 0152-05 పాడి సం: 02-244 భగవద్గీత కీర్తనలు
పల్లవి: ఈ రూపమై వున్నాఁడు యీతఁడే పరబ్రహ్మము
శ్రీరమాదేవితోడ శ్రీవేంకటేశుఁడు
చ. 1: పొదలి మాయాదేవిపట్టిన సముద్రము
అదె పంచభూతాలుండే అశ్వత్థము
గుదికొన్న బ్రహ్మాండాల గుడ్లఁ బెట్టే హంస
సదరపుబ్రహ్మలకు జలజమూలకందము
చ. 2: అనంతవేదాలుండేటి అక్షయవటపత్రము
ఘనదేవతలకు శ్రీకరయజ్ఞము
కనలు దానవమత్తగజసంహారసింహము
మొనసి సంసారభారము దాల్చేవృషభము
చ. 3: సతతము జీవులకు చైతన్యసూత్రము
అతిశయభక్తుల జ్ఞానామృతము
వ్రతమై శ్రీవేంకటాద్రి వరముల చింతామణి
తతిగొన్న మోక్షపు తత్త్వరహస్యము