ఈ పుట ఆమోదించబడ్డది
రేకు: 0149-02 కాంబోది సం: 02-224 శరణాగతి
పల్లవి: ఏమని విన్నవింతు నిదివో నా భాగ్యము
కామించి మీ శరణంటిఁ గమలారమణా
చ. 1: కలది యందరికైతేఁ గర్మఫలము
కెలన నాకైతే నీకృపాఫలము
అల సురలకు మథితామృతము
నెలకొన్న నాకైతే నీనామామృతము
చ. 2: సకలాత్మల బ్రదుకు సంసారమూలము
ప్రకటించ నాకైతే నీ పాదమూలము
వెకలి లోకులరతి వీథివీథిని నా-
త్రికరణరతి నీదివ్యభావవీథిని
చ. 3: రంగుగ బాంధవ మందరకు బంధుజనులందు
సంగతి నాకు నీ భక్తజనులయందు
అంగవించి శ్రీవేంకటాధిప నన్నేలితివి
చెంగట నా ధ్యానము నీ శ్రీమూర్తియందు
