ఈ పుట ఆమోదించబడ్డది
రేకు: 0134-04 మాళవి సం: 02-140 ఉపమానములు
పల్లవి: ఇందుకుఁ జింతించనేల యీశ్వరుని మాయ లివి
యెందుకు మూలము హరి యీతనిఁ జింతించరే
చ. 1: అల నారికడపుఁ గాయకు నీరు వచ్చినయట్టు
తలఁచి రాఁగల మేలు తన్నుఁ దానే వచ్చురే
లలి నేనుగుదిన్న వెలఁగపంటి బేసము-
వలెనే పోఁగలవెల్ల వడిఁ దానే పోవురే
చ. 2: నిండిన యద్దములోన నీడ వొడచూపినట్టు
దండియైన పుట్టుగులు తన్నుఁ దానే వచ్చురే
పండిన పండ్లు తొడమఁబాసి వూడినయట్టు
అండనే మరణములు అందరికి సరిరే
చ. 3: పెనురాతిపై గడవ పెట్టగాఁ గుదురై నట్టు
తనుఁదానే చింతింపఁ దలఁపు నిలుచురే
ఘనుఁడు శ్రీవేంకటేశుఁ గని శరణన్నఁ జాలు
వెనక పాపాలు మంచు విచ్చినట్టు విచ్చురే