రేకు: 0274-05 గుజ్జరి సం: 03-428 వైరాగ్య చింత
పల్లవి : |
దేవ నీవేకాల మెట్టు దిప్పినాఁ దిరుగుట గా-
కీవలఁ బెద్దరికము యెక్కడిదో తనకు
|
|
చ. 1: |
దొరకొని జీవుఁడు దుఃఖముల కోపఁడు
నరకములోనఁ దననాఁటి పాటెంచఁడు గాని
సిరుల కొరకుఁగాఁ జిందువందయ్యీఁ బ్రాణి
పురువై పుట్టినపుడే బుద్ధులెందు వోయనో
|
|
చ. 2: |
పొల్లువోకీ మేను నేఁడు భోగించకుండలేదు
తల్లికడుపులోనుండి తానేమి భోగించెనో
యిల్లు ముంగి లాసపడీ నిప్పుడే యీగుణము
తొల్లి జనించనినాఁడు తొలఁగి యెందుండెనో
|
|
చ. 3: |
గుక్కక మనసు నేఁడు కోరక వుండఁగలేదు
తక్కి బ్రహ్మప్రళయానఁ దా నెట్లుండెనో
నిక్కి శ్రీవేంకటేశ్వర నీమరఁగు నేఁ జొచ్చితి
యెక్కువఁ దానిటమీఁద నెందుకు దాఁగీనో
|
|