ఈ పుట అచ్చుదిద్దబడ్డది
రేకు: 0360-02 ముఖారి సం: 04-352 దశావతారములు
పల్లవి:
వింతనా నేఁ దనకు వేసాలవాఁడు
కంతునికి గురుఁ డనగలిగినవాఁడు
చ. 1:
జడిగొని మొదలఁ దా జలసూత్రపువాఁడు
వెడమాయలుగ బారి విద్యలవాఁడు
కడుసోద్యములనే కర్మపుఁ జేఁతలవాఁడు
అడరి కంభపుసూత్ర మాడెడివాఁడు
చ. 2:
యిలనుండి మిన్ను ముట్టే యింద్రజాలములవాఁడు
తల ద్రుంచి బ్రదికించుతక్కులవాఁడు
తెలియఁ గొండలు నీళ్ళఁ దేలవేసినవాఁడు
కలసి పగలు రేయిగాఁ జేసేవాఁడు
చ. 3:
మగువల భ్రమ యించే మౌన వ్రతముల వాఁడు
వెగటై రాయి గంతులు వేయించేవాఁడు
చిగిరించే వరముల శ్రీ వేంకటాద్రివాఁడు
బగివాయ కిట మమ్ముఁ బాలించేవాఁడు