ఈ పుట అచ్చుదిద్దబడ్డది
రేకు: 0355-02 లలిత సం: 04-322 మనసా
పల్లవి:
దొరకినయప్పుడే తుదగాక
మరుగకుమెన్నఁడు మరి మనసా
చ. 1:
తనుభోగంబులఁ దనిపినపిమ్మట
వెనుకొని హరిఁ దడవేనంటే
దినమునుఁ దను నింద్రియములచల మిది
తనియుట యెన్నఁడు దగు మనసా
చ. 2:
తిరమగునాల దీరినపిమ్మట
తెరలి విరతిఁ బొందే నంటే
మరలని యాశామయ మీచిత్తము
విరతి యెన్నఁడిఁక వెడ మనసా
చ. 3:
ముదిసినపిమ్మట మొగి శ్రీవేంకట -
సదయుఁ గొలుతు నిచ్చలునంటే
హృదయము శ్రీవేంకటేశునినెల విది
యిదిగనుటెన్నఁడు యీమహి మనసా