ఈ పుట అచ్చుదిద్దబడ్డది
రేకు: 0163-6 కేదారగౌళ సంపుటం: 07-374
పల్లవి:
చిత్తగించు నీవీకెకు సింగారము
బత్తిసేసెనాపె నీకుఁ బాయనిసింగారము
చ.1:
చెలియ మోమునకును చిరునవ్వు సింగారము
చిలుకుఁ జూపు కన్నుల సింగారము
కలితంపుఁజెక్కులకు కళలు సింగారము
లలిమీర నొసలి కలకలు సింగారము
చ.2:
ఉన్నతపు చన్నులకు నొరపు సింగారము
చిన్ననడిమికి నారు సింగారము
అన్నువ చేతులకు నొయ్యారి గోళ్ళే సింగారము
తిన్ననిమెడకు సోగతీరు సింగారము
చ.3:
నవకపుఁబాదాలకు నడపు సింగారము
చివురుమోవికి మించు సింగారము
తివిరి శ్రీ వేంకటేశ తెరవఁగూడితి విట్టే
సవరనిమేనికందచందమే సింగారము