ఈ పుట అచ్చుదిద్దబడ్డది
రేకు: 0237-1 నాదరామక్రియ సంపుటం: 08-217
పల్లవి:
ఎచటనుండివచ్చితి వెదురుచూచితి నీకు
రచనమన్నించి నన్ను రవ్వగాఁజేసితివి
చ. 1:
కొండలరాయఁడ నన్నుఁ గోరి వలపంచితివి
నిండు నాతలపోఁతలు నీకె శలవు
దండి విరహము రేఁచి తడవేలసేసితివి
అండనే నాచిరుఁజెమటది నీకె శలవు
చ. 2:
కోనేటివిభుఁడ నన్ను గురుతుగానేలితివి
నేనెట్లనుండినాను నీకె శలవు
ఆనుకొని యింతేసి ఆసలనె పెట్టితివి
పూనిన పులకమోపులు నీకె శలవు
చ. 3:
శ్రీవెంకటేశుఁడ నన్ను సేసవెట్టి కూడితివి
నీవద్ద నలసినది నీకె శలవు
కైవసము చేసుకొని కందువఁ జొక్కితివి
యీవిధాల నేభోగించే దిది నీకె శలవు