ఈ పుట అచ్చుదిద్దబడ్డది
రేకు: 0035-5 వరాళి సంపుటం: 06-140
పల్లవి:
కలిగెంగా నేఁడు కాంతకు లోని
వలవంత సొలపులే వరునిసన్నుతులు
చ. 1:
చెలువపు విభునిఁ జూచిన కన్నులకును
మలయు లేఁగురులే చామరతతులు
కలికి రమణునిఁ బొగడిననోరికిని
అలము నిట్టూర్పులే ఆలవట్టములు
చ. 2:
సిరులందు విభుని డాఁచిన తలంపునకు
అరిది తలంపులే పాయనిపూజలు
పరువంపుఁబతి నాసపడిన గుబ్బలకు
అరవిరి చెమటలే అభిషేకములు
చ. 3:
వెంకటపతితో నవ్విన నవ్వులకును
అంకెలమోవి తియ్యని బోనము
జంకించి యితనిపైఁ జూఁచు బొమ్మలకు
బింకపునటనలే ప్రియములగములు