ఈ పుట అచ్చుదిద్దబడ్డది
రేకు: 0033-5 శ్రీరాగం సంపుటం: 06-128
పల్లవి:
ఎఱుంగుదు మిదే నీయేతు లెల్లా
తెఱవల నిటు దినదినము నేఁచేవు
చ. 1:
చూపులనే తనిపేవు సొలపు లాడేవు
తీపులం గ్రిందుపడేవు తేలించేవు
ఆపనికి బెట్టుగా న న్నదలించేవు
మాపటి చేఁతలకే మచ్చిక చల్లేవు
చ. 2:
అడుగరాని దడిగే వాసలు సేసేవు
మడుగులు గలంచేటి మాట లాడేవు
అడరి రాయి గరంగ నలపు చూపేవు
వడి నందనిపనికి వలపు చల్లేవు
చ. 3:
చీర వెలిగా నవ్వేవు సిగ్గు విడిచేవు
మోర నిడుపు చేసుక మూఁతులు నాఁకేవు
చేరి చెఱంగు వట్టేవు శ్రీవేంకటేశుండా
సారెకు నిట్టే కూడేవు చనువు లిచ్చేవు
