పుట:ఆంధ్రకామందకము (జక్కరాజు వేంకటకవి).pdf/81

క.⁠

ధర్మార్థం బగుహింసలు ధార్మికులై మునులఁ బోలి తగురాజులు ము న్నిర్మలులై యొనరిచి రిది ధర్మము గావున వధింపఁదగు పాపాత్మున్.

⁠ 78

క.⁠

జనపతి ధర్మముఁ దప్పక ధన మార్జింపంగవలయు ధర్మముకొఱకై జనులను బీడింపుదు రే జను లనిశము వారిచేఁత శాసింపఁదగున్.

⁠ 79

క.⁠

ఎట్టిది మెత్తురు సజ్జను లట్టిదెపో ధర్మ మనఁగ నలరుం ధరలో నెట్టిది మెచ్చరు సజ్జను లట్టిదియ యధర్మ మనఁగ నలరుచునుండున్.

⁠ 80

క.⁠

జనపతి సుజనుల మర్యా దనె మెలఁగుచు వినయమునను ధర్మ మధర్మం బును దెలియుచుఁ దా భూప్రజ లను బ్రోవఁగఁ దగును దూష్యులం దునుమఁదగున్.

⁠ 81

వ.⁠

అవ్విధం బెట్టిదంటేని.

⁠ 82

గీ.⁠

అధిపు చనవరులగుచు రాజ్యంబుఁ జెఱుచు పాపకర్ముల మూఁకలై పరగువారి నొక్కఁడొక్కఁడుగా నేని నుండువారి దూష్యులని పల్కుదురు నయధుర్యు లెందు.

⁠ 83

వ.⁠

అట్టి దూష్యజనంబులం జనంబు లెవ్వరు నెఱుంగకుండ ధనంబు చేతనైనను గైదువులచేతనైన నుపాంశుదండప్రకారంబున దండింపవలయు నొండె, లోకశత్రువులని సకలజనంబులచేత నిందనొందించి ప్రకాశదండంబుచేతనైనను జంపవలయు నందు నుపాంశుదండప్రకారంబు.

⁠ 84