పుట:ఆంధ్రకామందకము (జక్కరాజు వేంకటకవి).pdf/209

చ.⁠

దళమగు తాటిక్రొవ్విరులదండలు గట్టినతోరణంబులుం బలువగు దంచనంబులును బాణము లాదిగఁగల్గు యంత్రముల్ దళుకగు టెక్కెముల్ గలుగు ద్వారము లాప్తులఁ గావఁజేయఁగా వలయు నృపాలశేఖరుఁ డవారితపూరితకీర్తిసారుఁడై.

⁠ 85

జాగ్రదవస్థిత్యావశ్యకత

క.⁠

పోవుచు వచ్చుచు వాకిటి కావలివారలకు నెఱుకఁగా సకలజనుల్ పోవలయు వైరిదూతలు భూవిభుననుమతినె యుండి పోవన్ వలయున్.

⁠ 86

గీ.⁠

రిత్తకోలాహలంబులు రిత్తహాస్య ములును జూదంబులును బానములును మాని సవరణల మించి యుత్సాహసహితు లగుచు బలము లెవ్వేళఁ గనుగల్గి పరగవలయు.

⁠ 87

క.⁠

తనకోటకు వెలుపలిదెసఁ దనబలము చరించుభూమిఁ దడవక వైరుల్ మొనసి చరియించుభూములె జనపతి చరియింపవలయుఁ జతురుం డగుచున్.

⁠ 88

వ.⁠

అది యెట్లన్నను.

⁠ 89

కంటకాదిభూదూషణము

క.⁠

ఒక్కొక యెడఁబడు పాఁతర లొక్కయెడన్ ముండ్లకంప లొకయెడ ముల్కుల్ మిక్కిలి గలిగించి రిపుల్ ద్రొక్కెడి చోట్లెల్లఁ జెఱుప దొరకొనవలయున్.

⁠ 90