తృతీయాశ్వాసము
69
జేత నీఁదుచుఁ బారంబుఁ జేరఁగాన
ధరణి మగనాలికంటెఁ బాతకియుఁ గలదె?52
మ. విరులెల్లన్ ప్రదరంబులయ్యె విధురుగ్వీచుల్ దలంపంగ బం
ధురహేతిప్రకరంబులయ్యె నళిసందోహంబు లెల్లన్ భయం
కరదుర్వారశిలీముఖప్రతతులై కన్పట్టె నేదిక్కులన్
మరుఁడయ్యెన్ సుఖ మెప్పుడో కలుగుటల్ నాతాపముల్ దీఱఁగన్.53
సీ. ఎన్నఁటికోకదా యెమ్మెకాని కరంబు
లెత్తి నాకన్నుల నొత్తుకొందు
నెన్నఁటికోకదా హృదయేశుసందిట
నివ్వటిల్లెడు ప్రేమఁ బవ్వళింతు
నెన్నఁటికోకదా వన్నెకానియురంబు
గబ్బిగుబ్బలఁ గ్రుమ్మి కౌఁగిలింతు
నెన్నఁటికోకదా యేలినసామికి
నందంపువాతెఱ విందొనర్తు
తే. నెన్నఁడోకద వగకాని కింపు మెఱయఁ
కంతుకయ్యంపువింతలు గానుపించి
హవుసు చెల్లింతుఁ జెలులలో నతిశయింతు
ననుచు నేనుందు నీయాన హంసయాన!54
తే. ఏఁబరాధీనఁ గావున నింతవంతఁ
గ్రాఁగుచుండంగవలసెను గాకయున్న
నెఱకలను గట్టికొనియైన నెగసివచ్చి
తనయెదను వ్రాల నాచిల్కతాళివలెను.55
ఉ. భారము లాయె నమ్మ కుచపాళికి హారము లేమిసేతు ని
స్సారము లాయె నమ్మ ఘనసారము మన్మథభూతభీమహుం
కారము లాయె నమ్మ కలకంఠనినాదము లమ్మచెల్ల, నా
ధారము లాయెనమ్మ పరితాపభరంబుల కెల్లఁ బ్రాణముల్.56