తాళ్ళపాక పదసాహిత్యం/మూడవ సంపుటం/రేకు 290
రేకు: 0290-01 నాట సం: 03-518 నృసింహ
పల్లవి:
దొరతనములతోడ తొడపై శ్రీసతితోడ
కేరలీఁ బంతముల సుగ్రీవ నారసింహము
చ. 2:
నిక్కిన కర్ణములతో నిట్టచూపు గుడ్లతో
మిక్కుటమైన పెద్దమీసాలతోడ
వెక్కసపు నోరితోడ వెలయు బుగ్గలతోడ
క్రిక్కిరిసీ నవ్వుల సుగ్రీవ నారసింహము
చ. 2:
చల్లు నూరుపులతోడ సంకుఁజక్రములతోడ
మొల్లమైన సహస్రకరములతోడ
తెల్లని మేనితోడ దిండైన పిరుఁదుతోడ
కెల్లు రేఁగీఁ గరుణ సుగ్రీవ నారసింహము
చ. 3:
విరుల పాదాలతోడ వెలయు సొమ్ములతోడ
తిరమైన కోటిసూర్యతేజముతోడ
విరుల దండలతోడ వేడుక శ్రీవేంకట-
గిరిమీఁద వెలసె సుగ్రీవ నారసింహము
రేకు: 0290-02 బౌళి సం: 03-519 హనుమ
పల్లవి:
వీఁడిగో నిలుచున్నాఁడు విజనగరములోన
పేఁడుకొన్న ప్రతాపానఁ బెద్ద హనుమంతుఁడు
చ. 1:
ఇదె పుట్టు గౌపీనము హేమ కుండలములతో-
నుదయించినాఁ డితఁ డుర్విమీఁదను
పదరి బాలార్కుని పండనుచుఁ బట్టినాఁడు
వదలక దేవతల వర మందినాఁడు
చ. 2:
నులిచి తా వాలము మిన్నులు మోవఁ జూఁచినాఁడు
జలధి దాఁటఁగ జంగ చాఁచినాఁడు
ఇల నసురలమీఁద వలచెయ్యెత్తినవాఁడు
నిలువెల్ల సాహసమై నిండుకొనున్నాఁడు
చ. 3:
పెక్కు పండ్ల గొలలు పిడికిలించినవాఁడు
మిక్కిలి లంక సాధించి మించినవాఁడు
ఇక్కువతో శ్రీవేంకటేశ్వరు బంటైనవాఁడు
తక్కక లోకములెల్లా దయఁ గాచేవాఁడు
రేకు: 0290-03 సామంతం సం: 03-520 నృసింహ
పల్లవి:
అనిశముఁ దలఁచరో అహోబలం
అనంతఫలదం బహోబలం
చ. 1:
హరినిజనిలయం బహోబలం
హరవిరించినుత మహోబలం
అరుణమణిశిఖర మహోబలం
అరిదైత్యహరణ మహోబలం
చ. 2:
అతిశయశుభదం బహోబలం
అతులమనోహర మహోబలం
హతదురితచయం బహోబలం
యతిమతసిద్ధం బహోబలం
చ. 3:
అగు శ్రీవేంకట మహోబలం
అగమ్య మసురల కహోబలం
అగపడుఁ బుణ్యుల కహోబలం
అగకులరాజం బహోబలం
రేకు: 0290-04 పాడి సం: 03-521 హనుమ
పల్లవి:
కలశాపురము కాడ గంధపు మాకుల నీడ-
నలరేవు మేలు మేలు హనుమంతరాయ
చ. 1:
సంజీవికొండ దెచ్చి సౌమిత్రి బ్రతికించితి
భంజించితి వసురుల బలువిడిని
కంజాప్తకుల రాఘవుని మెప్పించితివి
అంజనీతనయ వో హనుమంతరాయ
చ. 2:
లంక సాధించితివి నీ లావులెల్లాఁ జూపితివి
కొంకక రాముని సీతఁ గూరిచితివి
లంకెల సుగ్రీవునికి లలిఁ బ్రధాని వైతివి
అంకెలెల్లాఁ నీకుఁ జెల్లె హనుమంతరాయ
చ. 3:
దిక్కులు గెలిచితివి ధీరతఁ బూజ గొంటివి
మిక్కిలి ప్రతాపాన మెరసితివి
ఇక్కువతో శ్రీవేంకటేశ్వరు బంట వైతివి
అక్కజపు మహిమల హనుమంతరాయ
రేకు: 0290-05 రామక్రియ సం: 03-522 హనుమ
పల్లవి:
అఖిలలోకైకవంద్య హనుమంతుఁడా సీత-
శిఖామణి రామునికిఁ జేకొని తెచ్చితివి
చ. 1:
అంభోధి లంఘించితివి హనుమంతుఁడ
కుంభినీజదూతవైతి గురు హనుమంతుఁడ
గంభీరప్రతాపమునఁ గడఁగితివి
జంభారిచే వరములు చయ్యన నందితివి
చ. 2:
అంజనీదేవికుమార హనుమంతుఁడ
కంజాప్తఫలహస్త ఘన హనుమంతుఁడ
సంజీవని దెచ్చిన శౌర్యుఁడవు
రంజిత వానరకులరక్షకుఁడ వైతివి
చ. 3:
అట లంక సాధించిన హనుమంతుఁడ
చటుల సత్త్వసమేత జయ హనుమంతుఁడ
ఘటన నలమేల్మంగకాంతు శ్రీవేంకటేశుకుఁ
దటుకన బంటవై ధరణి నిల్చితివి
రేకు: 0290-06 గౌళ సం: 03-523 దశావతారములు
పల్లవి:
త్రిజగముల నెరుఁగు దేవదేవుఁడు
అజుని జనకుఁడైన ఆదినారాయణుఁడు
చ. 1:
గరుడని మీఁదనెక్కి ఘనచక్రము చేఁబట్టి
పరమపదాన నుండి పరతెంచి
మురిపేన కరిఁ గాచి మొసలిఁ దుంచినవాఁడు
అరుదైన ప్రతాపపు ఆదినారాయణుఁడు
చ. 2:
కనకాంబరము గట్టి కౌస్తుభము మెడఁ బెట్టి
వెనువెంట శ్రీసతి సేవించుచుండఁగా
పనివూని జయముతో పాంచజన్యము వట్టి
అనిశముఁ గరుణించీ నాదినారాయణుఁడు
చ. 3:
త్రిదశులు నుతియించ దిక్కులెల్లా నుల్లసిల్ల
ముదమున దాసులెల్లా మొక్కఁగాను
వదల కెల్లవారికి వరములిచ్చీవాఁడే
అదె శ్రీవేంకటవిభుఁ డాదినారాయణుఁడు