తాళ్ళపాక పదసాహిత్యం/నాలుగవ సంపుటం/రేకు 369
రేకు: 0369-01 గుండక్రియ సం: 04-404 మాయ
పల్లవి:
ఎఱఁగఁడు పరసుఖ మీశ్వర నీమాయ
నెఱి విచారముల నెగడిన దాఁక
చ. 1:
అతిహేయములో నడరు వరాహము
అతిహేయము సుఖమని తలఁచు
మతి సంసారంబే మరగిన యాతుమ
పతిలేని దిదే పరమని తెలియు
చ. 2:
పొరి విషయములోనఁ బొడమిన కీటము
అరిది విషమ తీపని తినును
పరగ యోని సంభవమగు దేహాతుమ
పెరిగి యందుకే ప్రియపడును
చ. 3:
యింతేసి నిన్నియు నెరఁగిన యీయాతుమ
అంతరాత్మ నీవని తలఁచి
యింతట శ్రీ వేంకటేశ్వర నిన్నే
రంతుల శరణనె రక్షించవే
రేకు: 0369-02 భూపాళం సం: 04-405 నామ సంకీర్తన
పల్లవి:
ఇవియే పో ప్రద్యుమ్న యిహ పర సాధనము
భవ జలధుల తేప పరమయోగులకు
చ. 1:
వామన గోవింద విష్ణు వాసుదేవ హరి కృష్ణ
దామోదరాచ్యుత మాధవ శ్రీధరా
నీమహిమ గానలేము నిన్నెంచఁగలేము నీ -
నామజపమే చాలు నాలుక సులభము
చ. 2:
అనిరుద్ధ పురుషోత్తమాధోక్షజ ఉపేంద్ర
జనార్ధన కేశవ సంకర్షణా
నినుఁ దలఁచఁగ లేము నిన్నుఁ దెలియఁగ లేము
నునుపై నీనామమే నోటికి సులభము
చ. 3:
నారాయణ పద్మనాభ హృషీకేశ
నారసింహ మధుసూదన త్రివిక్రమ
నీరూపు భావించలేము నిక్కపు శ్రీ వేంకటేశ
ఆరయ నీనామజప మన్నిటా సులభము
రేకు: 0369-03 లలిత సం: 04-406 శరణాగతి
పల్లవి:
కన్ను లెదుటిదే ఘన వైకుంఠము
వెన్నుని గొలిచిన విజ్ఞానికిని
చ. 1:
తలఁచినదెల్లాఁ దత్వ రహస్యమే
తెలిసిన యోగికి దినదినము
పలికినవెల్లా పరమ మంత్రములె
ఫలియించిన హరి భక్తునికి
చ. 2:
పట్టినదెల్లా బ్రహ్మాత్మకమే
పుట్టుగు గెలిచిన పుణ్యునికి
మెట్టినదెల్లా మిన్నేటినిధులే
ఱట్టడితెగువ మెఱయు వానికిని
చ. 3:
వినినవియల్లా వేదాంతములే
ఘనుఁడగు శరణాగతునికిని
యెనసిన శ్రీ వేంకటేశుఁడే యింతా
కొనకెక్కిన నిజ కోవిదునికిని
రేకు: 0369-04 సామంతం సం: 04-407 మాయ
పల్లవి:
బాపు బాపు దేవుఁడా పంతపు వోమనసా
వోపెఁగా యిందుకు జీవుఁ డోహో నామాయ
చ. 1:
నిన్నటిదినము నేఁడు నిజమో కల్లో
కన్నులఁ గన్నట్లాయఁ గానఁగరాదు
యెన్నఁగ రేపటిదిన మేమో యెట్లో
వున్నట్టు దెలియఁగరాదు వోహో నీమాయ
చ. 2:
బాలఁనాటి పుట్టుగిది భ్రమయో నిజమో
గాలినె కాలముఁ బోయ కతలాయను
యీలీల మీఁదిమరణ మేమో యెట్టో
వోలిఁ దెలియఁగరాదు వోహో నీమాయ
చ. 3:
నెక్కుఁ మింగినకడి నిజమో కల్లో
గక్కున రుచియుఁ దోచె కానఁగరాదు
యెక్కువ శ్రీ వేంకటేశ యిన్నియు వీదాసుఁడైతే
వొక్కటఁ గానఁగవచ్చు నోహో నీమాయ
రేకు: 0369-05 గుండక్రియ సం: 04-408 అంత్యప్రాస
పల్లవి:
వెరగుతో మరచితే వెనక లేదు
కరి వరదుఁడే తక్క గతి యొండు లేఁడు
చ. 1:
ఆస విడిచినఁగాని యధిక సుఖము లేదు
యీసు విడిచినఁగాని యిహము లేదు
వాసి విడిచినఁ గాని వైపగు విరతి లేదు
వాసు దేవ భక్తిఁగాని వరముక్తి లేదు
చ. 2:
చలము మానినఁగాని సాత్వికగుణము లేదు
పలుశంక వోకకాని ఫలము లేదు
సిలుగింద్రియాల గెలిచినఁగాని త్రోవ లేదు
జలజాక్షుచింతఁగాని సమబుద్ధిలేదు
చ. 3:
దైవము కరుణనెకాని తగువిజ్ఞానము లేదు
భావించి చూచినఁగాని బలిమి లేదు
యీవల శ్రీ వేంకటేశుఁ డితడె దైవ మితని
సేవించినంతఁగాని సిద్ధి మరి లేదు
రేకు: 0369-06 భైరవి సం: 04-409 మనసా
పల్లవి:
హరినామము కడు నానందకరము
మరుగవో మరుగవో మరుగవో మనసా
చ. 1:
నలినాక్షుని శ్రీ నామము
కలి దోష హరము కైవల్యము
ఫలసారము బహుబ౦ధ మోచనము
తలఁచవో తలఁచవో తలఁచవో మనసా
చ. 2:
నగధరు నామము నరక హరణము
జగదేక హితము సమ్మతము
సగుణ నిర్గుణము సాక్షాత్కారము
పొగడవో పొగడవో పొగడవో మనసా
చ. 3:
కడఁగి శ్రీ వేంకటపతి నామము
బడిబడినే సంవత్కరము
అడియాలంబిల నతి సుఖ మూలము
తడవవో తడవవో తడవవో మనసా