తాళ్ళపాక పదసాహిత్యం/నాలుగవ సంపుటం/రేకు 305
రేకు: 0305-01 రామక్రియ సం: 04-025 అంత్యప్రాస
పల్లవి:
భావించరో వేదములు పలికేటి వునికి
జీవులు బ్రహ్మానందముఁ జెందేటి వునికి
చ. 1:
నిచ్చలు నిద్దురలకు నెలవైన వునికి
యిచ్చలఁ గలలు గన నిరవైన వునికి
కుచ్చిన నిట్టూర్పులకొన దాఁకే వునికి
తచ్చిన మాటలధ్వని దాఁకేటి వునికి
చ. 2:
మునుకొన్న చూపులకు మొదలైన వునికి
అనిశము కతలెల్ల నాలకించే వునికి
వెనుకొన్న చవులెల్లా వెలవెట్టే వునికి
గునిసి మేల్‌కనుటకు గురియైన వునికి
చ. 3:
వావిరి నింద్రియపరవశమందే వునికి
కైవశమై పదియారుకళలుండే వునికి
చావకుండా నమృతము జాలువారే వునికి
శ్రీవేంకటేశుపాదాలు చింతించే వునికి
రేకు: 0305-02 దేవగాంధారి సం: 04-026 కళ్యాణ కీర్తనలు
పల్లవి:
అమరాంగన లదె యాడేరు
ప్రమదంబున నదె పాడేరు
చ. 1:
గరుడవాహనుఁడు కనకరథముపై
యిరువుగ వీధుల నేఁగీని
సురలును మునులును సొంపుగ మోఁకులు
తెరలిచి తెరలిచి తీసేరు
చ. 2:
యిలధరుఁడదివో యింద్రరథముపై
కెలయుచు దిక్కులు గెలిచీని
బలు శేషాదులు బ్రహ్మశివాదులు
చెలఁగి సేవలటు సేసేరు
చ. 3:
అలమేల్మంగతో నటు శ్రీవేంకట
నిలయుఁ డరదమున నెగడీని
నలుగడ ముక్తులు నారాదాదులును
పొలుపు మిగులఁ గడుఁ బొగడేరు
రేకు: 0305-03 దేపాళం సం: 04-027 కృస్ణ
పల్లవి:
అడుకులు చక్కిలాలు ఆనవాలు నురుగులు
వడపప్పు మొదలుగా వాముల కొలఁదులు
చ. 1:
దేవకి కొడుకుఁగన్న దినమిది శ్రీజయంతి
భావించ మన కన్నులపండుగులాయ
దేవునిఁ బూజించితిమి తేరో నైవేద్యాలు
కైవసమై కృష్ణునికి గంపల కొలఁదులు
చ. 2:
వసుదేవుఁ డెత్తెను శ్రావణబహుళాష్టమిని
పసగాఁ దొట్లే నూఁచి పాడఁగలిగె
సిసువితనికి మొక్కి చేసేము జాగరాలు
కొసరరో వరములు కోట్ల కొలఁదులు
చ. 3:
బలభద్రుతమ్ముఁ డాయ పతి యలమేల్మంగకు
నెలమితో మనకెల్ల నేలికాయ
తలఁచి శ్రీవేంకటాద్రిఁ దానే యవతారమందె
అల సంతోషమందరో అబ్బినకొలఁదులు
రేకు: 0305-04 ముఖారి సం: 04-028 గురు వందన, నృసింహ
పల్లవి:
ఏ బలిమి నమ్మి వెరపెరఁగరు దేహులాల
గాబువలెఁ బెరిగేరు కాలము విూచుట్టమా
చ. 1:
చెలరేఁగి దానములు సేసినట్టి బలిమో
అలరి కర్మము సేసినట్టి బలమో
చలపట్టి తపము లాచరించిన బలిమో
కొలఁదిలేక సురలఁ గొలిచిన బలిమో
చ. 2:
ధీరత సుజ్ఞానము దెలిసిన బలిమో
కోరక విరక్తి గైకొన్నబలిమో
శూరత లోకానకెల్లఁ జుట్టమైన బలివమో
వూరకే బ్రహ్మకల్పము లుండేటట్టి బలిమో
చ. 3:
పరగ శ్రీపతినామపఠనము బలిమో
హరిదాసుల శరణన్నట్టి బలిమో
సిరుల శ్రీవేంకటేశు సేవచేసిన బలిమో
గురుభక్తితోడ నెక్కువయైన బలిమో
రేకు: 0305-05 నారాయణి సం: 04-029 భగవద్గీత కీర్తనలు
పల్లవి:
అనాది జగమున కౌభళము
అనేకాద్భుతం బౌభళము
చ. 1:
హరినివాస మీ యౌభళము
అరిది పరమపద మౌభళము
అరిదైత్యాంతక మౌభళము
హరముఖసేవిత మౌభళము
చ. 2:
అమలరమాకర మౌభళము
అమితమునీంద్రం బౌభళము
అమరవందితం బౌభళము
అమరెఁ బుణ్యముల నౌభళము
చ. 3:
అగరాజంబీ యౌభళము
అగణితతీర్థం బౌభళము
తగు శ్రీవేంకటధామవిహారం-
బగు శుభాంచితం బౌభళము
రేకు: 0305-06 మాళవిగౌళ సం: 04-030 భగవద్గీత కీర్తనలు
పల్లవి:
విచారించుకొనేవారి వివేకాల కొలఁదులు
పచారించి వున్నవెల్ల భావనమాత్రములు
చ. 1:
జగములన్ని నీశరీరమేకనక
తగు వైకుంఠాలే వుండేతావు లెల్లాను
పొగరు స్వర్గ నరకభూములనే లోకాలెల్ల
పగటున తమలోని భావనమాత్రములు
చ. 2:
అన్ని పదార్థాలు నీయందే పుట్టివచ్చేఁగాన
తిన్నని నీప్రసాదాలే దినభోగాలు
వన్నెల నిష్టానిష్ట వస్తుభేదము లెల్లాను
పన్నుకొన్న యటువంటి భావనమాత్రములు
చ. 3:
అంతరాత్మవు శ్రీవేంకటాధిప నీవేకాన
చెంతల నీ కైంకర్యాలే చేఁతలెల్లాను
వింతలైన సంసార విహారములెల్లాను
బంతినే నానావిధ భావనమాత్రములు