కిష్కింధకాండము - సర్గము 2
శ్రీమద్వాల్మీకియరామాయణే కిష్కింధాకాండే ద్వితీయః సర్గః |౪-౨|
| వాల్మీకి రామాయణము | ||||||||||
|---|---|---|---|---|---|---|---|---|---|---|
| ||||||||||
తౌ తు దృష్ట్వా మహాత్మానౌ భ్రాతరౌ రామ లక్ష్మణౌ |
వర ఆయుధ ధరౌ వీరౌ సుగ్రీవః శ్ఙ్కితోఽభవత్ |౪-౨-౧|
ఉద్విగ్న హృదయః సర్వా దిశః సమవలోకయన్ |
న వ్యతిష్ఠత కస్మిన్ చిత్ దేశే వానర పుఙ్గవః |౪-౨-౨|
నైవ చక్రే మనః స్థాతుం వీక్షమాణో మహాబలౌ |
కపేః పరమ భీతస్య చిత్తం వ్యవససాద హ |౪-౨-౩|
చింతయిత్వా స ధర్మాత్మా విమృశ్య గురు లాఘవం |
సుగ్రీవః పరమ ఉద్విగ్నః సర్వైః తైః వానరైః సహ |౪-౨-౪|
తతః స సచివేభ్యః తు సుగ్రీవః ప్లవగాధిపః |
శశంస పరమ ఉద్విగ్నః పశ్యన్ తౌ రామ లక్ష్మణౌ |౪-౨-౫|
ఏతౌ వనం ఇదం దుర్గం వాలి ప్రణిహితౌ ధ్రువం |
ఛద్మనా చీర వసనౌ ప్రచరంతౌ ఇహ ఆగతౌ |౪-౨-౬|
తతః సుగ్రీవ సచివా దృష్ట్వా పరమ ధన్వినౌ |
జగ్ముః గిరి తటాత్ తస్మాద్ అన్యత్ శిఖరం ఉత్తమం |౪-౨-౭|
తే క్షిప్రం అభిగమ్య అథ యూథపా యూథపర్షభం |
హరయో వానర శ్రేష్ఠం పరివార్య ఉపతస్థిరే |౪-౨-౮|
ఏవం ఏక ఆయన గతాః ప్లవమానా గిరేః గిరిం |
ప్రకంపయంతో వేగేన గిరీణాం శిఖరాణి చ |౪-౨-౯|
తతః శాఖా మృగాః సర్వే ప్లవమానా మహాబలాః |
బభంజుః చ నగాన్ తత్ర పుష్పితాన్ దుర్గం ఆశ్రితాన్ |౪-౨-౧౦|
ఆప్లవంతో హరివరాః సర్వతః తం మహాగిరిం |
మృగ మార్జార శార్దూలాన్ త్రాసయంతో యయుః తదా |౪-౨-౧౧|
తతః సుగ్రీవ సచివాః పర్వతేంద్రే సమాహితాః |
సంగమ్య కపి ముఖ్యేన సర్వే ప్రాంజలయః స్థితాః |౪-౨-౧౨|
తతః తు భయ సంత్రస్తం వాలి కిల్బిష శంకితం |
ఉవాచ హనుమాన్ వాక్యం సుగ్రీవం వాక్య కోవిదః |౪-౨-౧౩|
సంభ్రమః త్యజతాం ఏష సర్వైః వాలి కృతే మహాన్ |
మలయోఽయం గిరివరో భయం న ఇహ అస్తి వాలినః |౪-౨-౧౪|
యస్మాత్ ఉద్విగ్న చేతాః త్వం విద్రుతో హరిపుంగవ |
తం క్రూర దర్శనం క్రూరం న ఇహ పశ్యామి వాలినం |౪-౨-౧౫|
యస్మాత్ తవ భయం సౌమ్య పూర్వజాత్ పాప కర్మణః |
స న ఇహ వాలీ దుష్టాత్మా న తే పశ్యామి అహం భయం |౪-౨-౧౬|
అహో శాఖా మృగత్వం తే వ్యక్తం ఏవ ప్లవంగమ |
లఘు చిత్తతయా ఆత్మానం న స్థాపయసి యో మతౌ |౪-౨-౧౭|
బుద్ధి విజ్ఞాన సంపన్న ఇఙ్గితైః సర్వం ఆచర |
న హి అబుద్ధిం గతో రాజా సర్వ భూతాని శాస్తి హి |౪-౨-౧౮|
సుగ్రీవః తు శుభం వాక్యం శ్రుత్వా సర్వం హనూమతః |
తతః శుభతరం వాక్యం హనూమంతం ఉవాచ హ |౪-౨-౧౯|
దీర్ఘ బాహూ విశాలాక్షౌ శర చాప అసి ధారిణౌ |
కస్య న స్యాత్ భయం దృష్ట్వా హి ఏతౌ సుర సుత ఉపమౌ |౪-౨-౨౦|
వాలి ప్రణిహితౌ ఏవ శంకే అహం పురుషోత్తమౌ |
రాజానో బహు మిత్రాః చ విశ్వాసో న అత్ర హి క్షమః |౪-౨-౨౧|
అరయః చ మనుష్యేణ విజ్ఞేయాః ఛద్మ చారిణః |
విశ్వస్తానాం అవిశ్వస్తాః ఛిద్రేషు ప్రహరంతి అపి |౪-౨-౨౨|
కృత్యేషు వాలీ మేధావీ రాజానో బహు దర్శనః |
భవంతి పర హంతారః తే జ్ఞేయాః ప్రాకృతైః నరైః |౪-౨-౨౩|
తౌ త్వయా ప్రాకృతేన ఏవ గత్వా జ్ఞేయౌ ప్లవంగమ |
ఇఙ్గితానాం ప్రకారైః చ రూపవ్యా భాషణేన చ |౪-౨-౨౪|
లక్షయస్వ తయోః భావం ప్రహృష్ట మనసౌ యది |
విశ్వాసయన్ ప్రశంసాభిః ఇఙ్గితైః చ పునః పునః |౪-౨-౨౫|
మమ ఏవ అభిముఖం స్థిత్వా పృచ్ఛ త్వం హరి పుంగవ |
ప్రయోజనం ప్రవేశస్య వనస్య అస్య ధనుర్ ధరౌ |౪-౨-౨౬|
శుద్ధ ఆత్మానౌ యది ఏతౌ జానీహి త్వం ప్లవంగమ |
వ్యాభాషితైః వా రూపైః వా విజ్ఞేయా దుష్టతా అనయోః |౪-౨-౨౭|
ఇతి ఏవం కపిరాజేన సందిష్టో మారుతాత్మజః |
చకార గమనే బుద్ధిం యత్ర తౌ రామ లక్ష్మణౌ |౪-౨-౨౮|
తథా ఇతి సంపూజ్య వచః తు తస్య కపేః సుభీతస్య దురాసదస్య |
మహానుభావో హనుమాన్ యయౌ తదా స యత్ర రామో అతిబలీ స లక్ష్మణః |౪-౨-౨౯|
ఇతి వాల్మీకి రామాయణే ఆది కావ్యే కిష్కింధాకాండే ద్వితీయః సర్గః |౪-౨|