అసర్జి వక్వా రథ్యే యథాజౌ ధియా మనోతా ప్రథమో మనీషీ |
దశ స్వసారో అధి సానో అవ్యే ऽజన్తి వహ్నిం సదనాన్య్ అచ్ఛ || 9-091-01
వీతీ జనస్య దివ్యస్య కవ్యైర్ అధి సువానో నహుష్యేభిర్ ఇన్దుః |
ప్ర యో నృభిర్ అమృతో మర్త్యేభిర్ మర్మృజానో ऽవిభిర్ గోభిర్ అద్భిః || 9-091-02
వృషా వృష్ణే రోరువద్ అంశుర్ అస్మై పవమానో రుశద్ ఈర్తే పయో గోః |
సహస్రమ్ ఋక్వా పథిభిర్ వచోవిద్ అధ్వస్మభిః సూరో అణ్వం వి యాతి || 9-091-03
రుజా దృళ్హా చిద్ రక్షసః సదాంసి పునాన ఇన్ద ఊర్ణుహి వి వాజాన్ |
వృశ్చోపరిష్టాత్ తుజతా వధేన యే అన్తి దూరాద్ ఉపనాయమ్ ఏషామ్ || 9-091-04
స ప్రత్నవన్ నవ్యసే విశ్వవార సూక్తాయ పథః కృణుహి ప్రాచః |
యే దుఃషహాసో వనుషా బృహన్తస్ తాంస్ తే అశ్యామ పురుకృత్ పురుక్షో || 9-091-05
ఏవా పునానో అపః స్వర్ గా అస్మభ్యం తోకా తనయాని భూరి |
శం నః క్షేత్రమ్ ఉరు జ్యోతీంషి సోమ జ్యోఙ్ నః సూర్యం దృశయే రిరీహి || 9-091-06
