సోమస్య ధారా పవతే నృచక్షస ఋతేన దేవాన్ హవతే దివస్ పరి |
బృహస్పతే రవథేనా వి దిద్యుతే సముద్రాసో న సవనాని వివ్యచుః || 9-080-01
యం త్వా వాజిన్న్ అఘ్న్యా అభ్య్ అనూషతాయోహతం యోనిమ్ ఆ రోహసి ద్యుమాన్ |
మఘోనామ్ ఆయుః ప్రతిరన్ మహి శ్రవ ఇన్ద్రాయ సోమ పవసే వృషా మదః || 9-080-02
ఏన్ద్రస్య కుక్షా పవతే మదిన్తమ ఊర్జం వసానః శ్రవసే సుమఙ్గలః |
ప్రత్యఙ్ స విశ్వా భువనాభి పప్రథే క్రీళన్ హరిర్ అత్యః స్యన్దతే వృషా || 9-080-03
తం త్వా దేవేభ్యో మధుమత్తమం నరః సహస్రధారం దుహతే దశ క్షిపః |
నృభిః సోమ ప్రచ్యుతో గ్రావభిః సుతో విశ్వాన్ దేవాఆ పవస్వా సహస్రజిత్ || 9-080-04
తం త్వా హస్తినో మధుమన్తమ్ అద్రిభిర్ దుహన్త్య్ అప్సు వృషభం దశ క్షిపః |
ఇన్ద్రం సోమ మాదయన్ దైవ్యం జనం సిన్ధోర్ ఇవోర్మిః పవమానో అర్షసి || 9-080-05
