ప్ర కవిర్ దేవవీతయే ऽవ్యో వారేభిర్ అర్షతి |
సాహ్వాన్ విశ్వా అభి స్పృధః || 9-020-01
స హి ష్మా జరితృభ్య ఆ వాజం గోమన్తమ్ ఇన్వతి |
పవమానః సహస్రిణమ్ || 9-020-02
పరి విశ్వాని చేతసా మృశసే పవసే మతీ |
స నః సోమ శ్రవో విదః || 9-020-03
అభ్య్ అర్ష బృహద్ యశో మఘవద్భ్యో ధ్రువం రయిమ్ |
ఇషం స్తోతృభ్య ఆ భర || 9-020-04
త్వం రాజేవ సువ్రతో గిరః సోమా వివేశిథ |
పునానో వహ్నే అద్భుత || 9-020-05
స వహ్నిర్ అప్సు దుష్టరో మృజ్యమానో గభస్త్యోః |
సోమశ్ చమూషు సీదతి || 9-020-06
క్రీళుర్ మఖో న మంహయుః పవిత్రం సోమ గచ్ఛసి |
దధత్ స్తోత్రే సువీర్యమ్ || 9-020-07
