ప్ర స్వానాసో రథా ఇవార్వన్తో న శ్రవస్యవః |
సోమాసో రాయే అక్రముః || 9-010-01
హిన్వానాసో రథా ఇవ దధన్విరే గభస్త్యోః |
భరాసః కారిణామ్ ఇవ || 9-010-02
రాజానో న ప్రశస్తిభిః సోమాసో గోభిర్ అఞ్జతే |
యజ్ఞో న సప్త ధాతృభిః || 9-010-03
పరి సువానాస ఇన్దవో మదాయ బర్హణా గిరా |
సుతా అర్షన్తి ధారయా || 9-010-04
ఆపానాసో వివస్వతో జనన్త ఉషసో భగమ్ |
సూరా అణ్వం వి తన్వతే || 9-010-05
అప ద్వారా మతీనామ్ ప్రత్నా ఋణ్వన్తి కారవః |
వృష్ణో హరస ఆయవః || 9-010-06
సమీచీనాస ఆసతే హోతారః సప్తజామయః |
పదమ్ ఏకస్య పిప్రతః || 9-010-07
నాభా నాభిం న ఆ దదే చక్షుశ్ చిత్ సూర్యే సచా |
కవేర్ అపత్యమ్ ఆ దుహే || 9-010-08
అభి ప్రియా దివస్ పదమ్ అధ్వర్యుభిర్ గుహా హితమ్ |
సూరః పశ్యతి చక్షసా || 9-010-09
