స్వాదిష్ఠయా మదిష్ఠయా పవస్వ సోమ ధారయా |
ఇన్ద్రాయ పాతవే సుతః || 9-001-01
రక్షోహా విశ్వచర్షణిర్ అభి యోనిమ్ అయోహతమ్ |
ద్రుణా సధస్థమ్ ఆసదత్ || 9-001-02
వరివోధాతమో భవ మంహిష్ఠో వృత్రహన్తమః |
పర్షి రాధో మఘోనామ్ || 9-001-03
అభ్య్ అర్ష మహానాం దేవానాం వీతిమ్ అన్ధసా |
అభి వాజమ్ ఉత శ్రవః || 9-001-04
త్వామ్ అచ్ఛా చరామసి తద్ ఇద్ అర్థం దివే-దివే |
ఇన్దో త్వే న ఆశసః || 9-001-05
పునాతి తే పరిస్రుతం సోమం సూర్యస్య దుహితా |
వారేణ శశ్వతా తనా || 9-001-06
తమ్ ఈమ్ అణ్వీః సమర్య ఆ గృభ్ణన్తి యోషణో దశ |
స్వసారః పార్యే దివి || 9-001-07
తమ్ ఈం హిన్వన్త్య్ అగ్రువో ధమన్తి బాకురం దృతిమ్ |
త్రిధాతు వారణమ్ మధు || 9-001-08
అభీమమ్ అఘ్న్యా ఉత శ్రీణన్తి ధేనవః శిశుమ్ |
సోమమ్ ఇన్ద్రాయ పాతవే || 9-001-09
అస్యేద్ ఇన్ద్రో మదేష్వ్ ఆ విశ్వా వృత్రాణి జిఘ్నతే |
శూరో మఘా చ మంహతే || 9-001-10
