ఆ తూ న ఇన్ద్ర క్షుమన్తం చిత్రం గ్రాభం సం గృభాయ |
మహాహస్తీ దక్షిణేన || 8-081-01
విద్మా హి త్వా తువికూర్మిం తువిదేష్ణం తువీమఘమ్ |
తువిమాత్రమ్ అవోభిః || 8-081-02
నహి త్వా శూర దేవా న మర్తాసో దిత్సన్తమ్ |
భీమం న గాం వారయన్తే || 8-081-03
ఏతో న్వ్ ఇన్ద్రం స్తవామేశానం వస్వః స్వరాజమ్ |
న రాధసా మర్ధిషన్ నః || 8-081-04
ప్ర స్తోషద్ ఉప గాసిషచ్ ఛ్రవత్ సామ గీయమానమ్ |
అభి రాధసా జుగురత్ || 8-081-05
ఆ నో భర దక్షిణేనాభి సవ్యేన ప్ర మృశ |
ఇన్ద్ర మా నో వసోర్ నిర్ భాక్ || 8-081-06
ఉప క్రమస్వా భర ధృషతా ధృష్ణో జనానామ్ |
అదాశూష్టరస్య వేదః || 8-081-07
ఇన్ద్ర య ఉ ను తే అస్తి వాజో విప్రేభిః సనిత్వః |
అస్మాభిః సు తం సనుహి || 8-081-08
సద్యోజువస్ తే వాజా అస్మభ్యం విశ్వశ్చన్ద్రాః |
వశైశ్ చ మక్షూ జరన్తే || 8-081-09
