అయం కృత్నుర్ అగృభీతో విశ్వజిద్ ఉద్భిద్ ఇత్ సోమః |
ఋషిర్ విప్రః కావ్యేన || 8-079-01
అభ్య్ ఊర్ణోతి యన్ నగ్నమ్ భిషక్తి విశ్వం యత్ తురమ్ |
ప్రేమ్ అన్ధః ఖ్యన్ నిః శ్రోణో భూత్ || 8-079-02
త్వం సోమ తనూకృద్భ్యో ద్వేషోభ్యో ऽన్యకృతేభ్యః |
ఉరు యన్తాసి వరూథమ్ || 8-079-03
త్వం చిత్తీ తవ దక్షైర్ దివ ఆ పృథివ్యా ఋజీషిన్ |
యావీర్ అఘస్య చిద్ ద్వేషః || 8-079-04
అర్థినో యన్తి చేద్ అర్థం గచ్ఛాన్ ఇద్ దదుషో రాతిమ్ |
వవృజ్యుస్ తృష్యతః కామమ్ || 8-079-05
విదద్ యత్ పూర్వ్యం నష్టమ్ ఉద్ ఈమ్ ఋతాయుమ్ ఈరయత్ |
ప్రేమ్ ఆయుస్ తారీద్ అతీర్ణమ్ || 8-079-06
సుశేవో నో మృళయాకుర్ అదృప్తక్రతుర్ అవాతః |
భవా నః సోమ శం హృదే || 8-079-07
మా నః సోమ సం వీవిజో మా వి బీభిషథా రాజన్ |
మా నో హార్ది త్విషా వధీః || 8-079-08
అవ యత్ స్వే సధస్థే దేవానాం దుర్మతీర్ ఈక్షే |
రాజన్న్ అప ద్విషః సేధ మీఢ్వో అప స్రిధః సేధ || 8-079-09
