యథా మనౌ వివస్వతి సోమం శక్రాపిబః సుతమ్ |
యథా త్రితే ఛన్ద ఇన్ద్ర జుజోషస్య్ ఆయౌ మాదయసే సచా || 8-052-01
పృషధ్రే మేధ్యే మాతరిశ్వనీన్ద్ర సువానే అమన్దథాః |
యథా సోమం దశశిప్రే దశోణ్యే స్యూమరశ్మావ్ ఋజూనసి || 8-052-02
య ఉక్థా కేవలా దధే యః సోమం ధృషితాపిబత్ |
యస్మై విష్ణుస్ త్రీణి పదా విచక్రమ ఉప మిత్రస్య ధర్మభిః || 8-052-03
యస్య త్వమ్ ఇన్ద్ర స్తోమేషు చాకనో వాజే వాజిఞ్ ఛతక్రతో |
తం త్వా వయం సుదుఘామ్ ఇవ గోదుహో జుహూమసి శ్రవస్యవః || 8-052-04
యో నో దాతా స నః పితా మహాఉగ్ర ఈశానకృత్ |
అయామన్న్ ఉగ్రో మఘవా పురూవసుర్ గోర్ అశ్వస్య ప్ర దాతు నః || 8-052-05
యస్మై త్వం వసో దానాయ మంహసే స రాయస్ పోషమ్ ఇన్వతి |
వసూయవో వసుపతిం శతక్రతుం స్తోమైర్ ఇన్ద్రం హవామహే || 8-052-06
కదా చన ప్ర యుచ్ఛస్య్ ఉభే ని పాసి జన్మనీ |
తురీయాదిత్య హవనం త ఇన్ద్రియమ్ ఆ తస్థావ్ అమృతం దివి || 8-052-07
యస్మై త్వమ్ మఘవన్న్ ఇన్ద్ర గిర్వణః శిక్షో శిక్షసి దాశుషే |
అస్మాకం గిర ఉత సుష్టుతిం వసో కణ్వవచ్ ఛృణుధీ హవమ్ || 8-052-08
అస్తావి మన్మ పూర్వ్యమ్ బ్రహ్మేన్ద్రాయ వోచత |
పూర్వీర్ ఋతస్య బృహతీర్ అనూషత స్తోతుర్ మేధా అసృక్షత || 8-052-09
సమ్ ఇన్ద్రో రాయో బృహతీర్ అధూనుత సం క్షోణీ సమ్ ఉ సూర్యమ్ |
సం శుక్రాసః శుచయః సం గవాశిరః సోమా ఇన్ద్రమ్ అమన్దిషుః || 8-052-10
