ప్ర సు శ్రుతం సురాధసమ్ అర్చా శక్రమ్ అభిష్టయే |
యః సున్వతే స్తువతే కామ్యం వసు సహస్రేణేవ మంహతే || 8-050-01
శతానీకా హేతయో అస్య దుష్టరా ఇన్ద్రస్య సమిషో మహీః |
గిరిర్ న భుజ్మా మఘవత్సు పిన్వతే యద్ ఈం సుతా అమన్దిషుః || 8-050-02
యద్ ఈం సుతాస ఇన్దవో ऽభి ప్రియమ్ అమన్దిషుః |
ఆపో న ధాయి సవనమ్ మ ఆ వసో దుఘా ఇవోప దాశుషే || 8-050-03
అనేహసం వో హవమానమ్ ఊతయే మధ్వః క్షరన్తి ధీతయః |
ఆ త్వా వసో హవమానాస ఇన్దవ ఉప స్తోత్రేషు దధిరే || 8-050-04
ఆ నః సోమే స్వధ్వర ఇయానో అత్యో న తోశతే |
యం తే స్వదావన్ స్వదన్తి గూర్తయః పౌరే ఛన్దయసే హవమ్ || 8-050-05
ప్ర వీరమ్ ఉగ్రం వివిచిం ధనస్పృతం విభూతిం రాధసో మహః |
ఉద్రీవ వజ్రిన్న్ అవతో వసుత్వనా సదా పీపేథ దాశుషే || 8-050-06
యద్ ధ నూనమ్ పరావతి యద్ వా పృథివ్యాం దివి |
యుజాన ఇన్ద్ర హరిభిర్ మహేమత ఋష్వ ఋష్వేభిర్ ఆ గహి || 8-050-07
రథిరాసో హరయో యే తే అస్రిధ ఓజో వాతస్య పిప్రతి |
యేభిర్ ని దస్యుమ్ మనుషో నిఘోషయో యేభిః స్వః పరీయసే || 8-050-08
ఏతావతస్ తే వసో విద్యామ శూర నవ్యసః |
యథా ప్రావ ఏతశం కృత్వ్యే ధనే యథా వశం దశవ్రజే || 8-050-09
యథా కణ్వే మఘవన్ మేధే అధ్వరే దీర్ఘనీథే దమూనసి |
యథా గోశర్యే అసిషాసో అద్రివో మయి గోత్రం హరిశ్రియమ్ || 8-050-10
