దూరాద్ ఇహేవ యత్ సత్య్ అరుణప్సుర్ అశిశ్వితత్ |
వి భానుం విశ్వధాతనత్ || 8-005-01
నృవద్ దస్రా మనోయుజా రథేన పృథుపాజసా |
సచేథే అశ్వినోషసమ్ || 8-005-02
యువాభ్యాం వాజినీవసూ ప్రతి స్తోమా అదృక్షత |
వాచం దూతో యథోహిషే || 8-005-03
పురుప్రియా ణ ఊతయే పురుమన్ద్రా పురూవసూ |
స్తుషే కణ్వాసో అశ్వినా || 8-005-04
మంహిష్ఠా వాజసాతమేషయన్తా శుభస్ పతీ |
గన్తారా దాశుషో గృహమ్ || 8-005-05
తా సుదేవాయ దాశుషే సుమేధామ్ అవితారిణీమ్ |
ఘృతైర్ గవ్యూతిమ్ ఉక్షతమ్ || 8-005-06
ఆ న స్తోమమ్ ఉప ద్రవత్ తూయం శ్యేనేభిర్ ఆశుభిః |
యాతమ్ అశ్వేభిర్ అశ్వినా || 8-005-07
యేభిస్ తిస్రః పరావతో దివో విశ్వాని రోచనా |
త్రీఅక్తూన్ పరిదీయథః || 8-005-08
ఉత నో గోమతీర్ ఇష ఉత సాతీర్ అహర్విదా |
వి పథః సాతయే సితమ్ || 8-005-09
ఆ నో గోమన్తమ్ అశ్వినా సువీరం సురథం రయిమ్ |
వోళ్హమ్ అశ్వావతీర్ ఇషః || 8-005-10
వావృధానా శుభస్ పతీ దస్రా హిరణ్యవర్తనీ |
పిబతం సోమ్యమ్ మధు || 8-005-11
అస్మభ్యం వాజినీవసూ మఘవద్భ్యశ్ చ సప్రథః |
ఛర్దిర్ యన్తమ్ అదాభ్యమ్ || 8-005-12
ని షు బ్రహ్మ జనానాం యావిష్టం తూయమ్ ఆ గతమ్ |
మో ష్వ్ అన్యాఉపారతమ్ || 8-005-13
అస్య పిబతమ్ అశ్వినా యువమ్ మదస్య చారుణః |
మధ్వో రాతస్య ధిష్ణ్యా || 8-005-14
అస్మే ఆ వహతం రయిం శతవన్తం సహస్రిణమ్ |
పురుక్షుం విశ్వధాయసమ్ || 8-005-15
పురుత్రా చిద్ ధి వాం నరా విహ్వయన్తే మనీషిణః |
వాఘద్భిర్ అశ్వినా గతమ్ || 8-005-16
జనాసో వృక్తబర్హిషో హవిష్మన్తో అరంకృతః |
యువాం హవన్తే అశ్వినా || 8-005-17
అస్మాకమ్ అద్య వామ్ అయం స్తోమో వాహిష్ఠో అన్తమః |
యువాభ్యామ్ భూత్వ్ అశ్వినా || 8-005-18
యో హ వామ్ మధునో దృతిర్ ఆహితో రథచర్షణే |
తతః పిబతమ్ అశ్వినా || 8-005-19
తేన నో వాజినీవసూ పశ్వే తోకాయ శం గవే |
వహతమ్ పీవరీర్ ఇషః || 8-005-20
ఉత నో దివ్యా ఇష ఉత సిన్ధూఅహర్విదా |
అప ద్వారేవ వర్షథః || 8-005-21
కదా వాం తౌగ్ర్యో విధత్ సముద్రే జహితో నరా |
యద్ వాం రథో విభిష్ పతాత్ || 8-005-22
యువం కణ్వాయ నాసత్యా ఋపిరిప్తాయ హర్మ్యే |
శశ్వద్ ఊతీర్ దశస్యథః || 8-005-23
తాభిర్ ఆ యాతమ్ ఊతిభిర్ నవ్యసీభిః సుశస్తిభిః |
యద్ వాం వృషణ్వసూ హువే || 8-005-24
యథా చిత్ కణ్వమ్ ఆవతమ్ ప్రియమేధమ్ ఉపస్తుతమ్ |
అత్రిం శిఞ్జారమ్ అశ్వినా || 8-005-25
యథోత కృత్వ్యే ధనే ऽంశుం గోష్వ్ అగస్త్యమ్ |
యథా వాజేషు సోభరిమ్ || 8-005-26
ఏతావద్ వాం వృషణ్వసూ అతో వా భూయో అశ్వినా |
గృణన్తః సుమ్నమ్ ఈమహే || 8-005-27
రథం హిరణ్యవన్ధురం హిరణ్యాభీశుమ్ అశ్వినా |
ఆ హి స్థాథో దివిస్పృశమ్ || 8-005-28
హిరణ్యయీ వాం రభిర్ ఈషా అక్షో హిరణ్యయః |
ఉభా చక్రా హిరణ్యయా || 8-005-29
తేన నో వాజినీవసూ పరావతశ్ చిద్ ఆ గతమ్ |
ఉపేమాం సుష్టుతిమ్ మమ || 8-005-30
ఆ వహేథే పరాకాత్ పూర్వీర్ అశ్నన్తావ్ అశ్వినా |
ఇషో దాసీర్ అమర్త్యా || 8-005-31
ఆ నో ద్యుమ్నైర్ ఆ శ్రవోభిర్ ఆ రాయా యాతమ్ అశ్వినా |
పురుశ్చన్ద్రా నాసత్యా || 8-005-32
ఏహ వామ్ ప్రుషితప్సవో వయో వహన్తు పర్ణినః |
అచ్ఛా స్వధ్వరం జనమ్ || 8-005-33
రథం వామ్ అనుగాయసం య ఇషా వర్తతే సహ |
న చక్రమ్ అభి బాధతే || 8-005-34
హిరణ్యయేన రథేన ద్రవత్పాణిభిర్ అశ్వైః |
ధీజవనా నాసత్యా || 8-005-35
యువమ్ మృగం జాగృవాంసం స్వదథో వా వృషణ్వసూ |
తా నః పృఙ్క్తమ్ ఇషా రయిమ్ || 8-005-36
తా మే అశ్వినా సనీనాం విద్యాతం నవానామ్ |
యథా చిచ్ చైద్యః కశుః శతమ్ ఉష్ట్రానాం దదత్ సహస్రా దశ గోనామ్ || 8-005-37
యో మే హిరణ్యసందృశో దశ రాజ్ఞో అమంహత |
అధస్పదా ఇచ్ చైద్యస్య కృష్టయశ్ చర్మమ్నా అభితో జనాః || 8-005-38
మాకిర్ ఏనా పథా గాద్ యేనేమే యన్తి చేదయః |
అన్యో నేత్ సూరిర్ ఓహతే భూరిదావత్తరో జనః || 8-005-39
