త్వావతః పురూవసో వయమ్ ఇన్ద్ర ప్రణేతః |
స్మసి స్థాతర్ హరీణామ్ || 8-046-01
త్వాం హి సత్యమ్ అద్రివో విద్మ దాతారమ్ ఇషామ్ |
విద్మ దాతారం రయీణామ్ || 8-046-02
ఆ యస్య తే మహిమానం శతమూతే శతక్రతో |
గీర్భిర్ గృణన్తి కారవః || 8-046-03
సునీథో ఘా స మర్త్యో యమ్ మరుతో యమ్ అర్యమా |
మిత్రః పాన్త్య్ అద్రుహః || 8-046-04
దధానో గోమద్ అశ్వవత్ సువీర్యమ్ ఆదిత్యజూత ఏధతే |
సదా రాయా పురుస్పృహా || 8-046-05
తమ్ ఇన్ద్రం దానమ్ ఈమహే శవసానమ్ అభీర్వమ్ |
ఈశానం రాయ ఈమహే || 8-046-06
తస్మిన్ హి సన్త్య్ ఊతయో విశ్వా అభీరవః సచా |
తమ్ ఆ వహన్తు సప్తయః పురూవసుమ్ మదాయ హరయః సుతమ్ || 8-046-07
యస్ తే మదో వరేణ్యో య ఇన్ద్ర వృత్రహన్తమః |
య ఆదదిః స్వర్ నృభిర్ యః పృతనాసు దుష్టరః || 8-046-08
యో దుష్టరో విశ్వవార శ్రవాయ్యో వాజేష్వ్ అస్తి తరుతా |
స నః శవిష్ఠ సవనా వసో గహి గమేమ గోమతి వ్రజే || 8-046-09
గవ్యో షు ణో యథా పురాశ్వయోత రథయా |
వరివస్య మహామహ || 8-046-10
నహి తే శూర రాధసో ऽన్తం విన్దామి సత్రా |
దశస్యా నో మఘవన్ నూ చిద్ అద్రివో ధియో వాజేభిర్ ఆవిథ || 8-046-11
య ఋష్వః శ్రావయత్సఖా విశ్వేత్ స వేద జనిమా పురుష్టుతః |
తం విశ్వే మానుషా యుగేన్ద్రం హవన్తే తవిషం యతస్రుచః || 8-046-12
స నో వాజేష్వ్ అవితా పురూవసుః పురస్థాతా మఘవా వృత్రహా భువత్ || 8-046-13
అభి వో వీరమ్ అన్ధసో మదేషు గాయ గిరా మహా విచేతసమ్ |
ఇన్ద్రం నామ శ్రుత్యం శాకినం వచో యథా || 8-046-14
దదీ రేక్ణస్ తన్వే దదిర్ వసు దదిర్ వాజేషు పురుహూత వాజినమ్ |
నూనమ్ అథ || 8-046-15
విశ్వేషామ్ ఇరజ్యన్తం వసూనాం సాసహ్వాంసం చిద్ అస్య వర్పసః |
కృపయతో నూనమ్ అత్య్ అథ || 8-046-16
మహః సు వో అరమ్ ఇషే స్తవామహే మీళ్హుషే అరంగమాయ జగ్మయే| |
యజ్ఞేభిర్ గీర్భిర్ విశ్వమనుషామ్ మరుతామ్ ఇయక్షసి గాయే త్వా నమసా గిరా|| 8-046-17
యే పాతయన్తే అజ్మభిర్ గిరీణాం స్నుభిర్ ఏషామ్ |
అజ్ఞమ్ మహిష్వణీనాం సుమ్నం తువిష్వణీనామ్ ప్రాధ్వరే || 8-046-18
ప్రభఙ్గం దుర్మతీనామ్ ఇన్ద్ర శవిష్ఠా భర |
రయిమ్ అస్మభ్యం యుజ్యం చోదయన్మతే జ్యేష్ఠం చోదయన్మతే || 8-046-19
సనితః సుసనితర్ ఉగ్ర చిత్ర చేతిష్ఠ సూనృత |
ప్రాసహా సమ్రాట్ సహురిం సహన్తమ్ భుజ్యుం వాజేషు పూర్వ్యమ్ || 8-046-20
ఆ స ఏతు య ఈవద్ ఆఅదేవః పూర్తమ్ ఆదదే |
యథా చిద్ వశో అశ్వ్యః పృథుశ్రవసి కానీతే ऽస్యా వ్యుష్య్ ఆదదే || 8-046-21
షష్టిం సహస్రాశ్వ్యస్యాయుతాసనమ్ ఉష్ట్రానాం వింశతిం శతా |
దశ శ్యావీనాం శతా దశ త్ర్యరుషీణాం దశ గవాం సహస్రా || 8-046-22
దశ శ్యావా ఋధద్రయో వీతవారాస ఆశవః |
మథ్రా నేమిం ని వావృతుః || 8-046-23
దానాసః పృథుశ్రవసః కానీతస్య సురాధసః |
రథం హిరణ్యయం దదన్ మంహిష్ఠః సూరిర్ అభూద్ |
వర్షిష్ఠమ్ అకృత శ్రవః || 8-046-24
ఆ నో వాయో మహే తనే యాహి మఖాయ పాజసే |
వయం హి తే చకృమా భూరి దావనే సద్యశ్ చిన్ మహి దావనే || 8-046-25
యో అశ్వేభిర్ వహతే వస్త ఉస్రాస్ త్రిః సప్త సప్తతీనామ్ |
ఏభిః సోమేభిః సోమసుద్భిః సోమపా దానాయ శుక్రపూతపాః || 8-046-26
యో మ ఇమం చిద్ ఉ త్మనామన్దచ్ చిత్రం దావనే |
అరట్వే అక్షే నహుషే సుకృత్వని సుకృత్తరాయ సుక్రతుః || 8-046-27
ఉచథ్యే వపుషి యః స్వరాళ్ ఉత వాయో ఘృతస్నాః |
అశ్వేషితం రజేషితం శునేషితమ్ ప్రాజ్మ తద్ ఇదం ను తత్ || 8-046-28
అధ ప్రియమ్ ఇషిరాయ షష్టిం సహస్రాసనమ్ |
అశ్వానామ్ ఇన్ న వృష్ణామ్ || 8-046-29
గావో న యూథమ్ ఉప యన్తి వధ్రయ ఉప మా యన్తి వధ్రయః || 8-046-30
అధ యచ్ చారథే గణే శతమ్ ఉష్ట్రాఅచిక్రదత్ |
అధ శ్విత్నేషు వింశతిం శతా || 8-046-31
శతం దాసే బల్బూథే విప్రస్ తరుక్ష ఆ దదే |
తే తే వాయవ్ ఇమే జనా మదన్తీన్ద్రగోపా మదన్తి దేవగోపాః || 8-046-32
అధ స్యా యోషణా మహీ ప్రతీచీ వశమ్ అశ్వ్యమ్ |
అధిరుక్మా వి నీయతే || 8-046-33
