అస్తభ్నాద్ ద్యామ్ అసురో విశ్వవేదా అమిమీత వరిమాణమ్ పృథివ్యాః |
ఆసీదద్ విశ్వా భువనాని సమ్రాడ్ విశ్వేత్ తాని వరుణస్య వ్రతాని || 8-042-01
ఏవా వన్దస్వ వరుణమ్ బృహన్తం నమస్యా ధీరమ్ అమృతస్య గోపామ్ |
స నః శర్మ త్రివరూథం వి యంసత్ పాతం నో ద్యావాపృథివీ ఉపస్థే || 8-042-02
ఇమాం ధియం శిక్షమాణస్య దేవ క్రతుం దక్షం వరుణ సం శిశాధి |
యయాతి విశ్వా దురితా తరేమ సుతర్మాణమ్ అధి నావం రుహేమ || 8-042-03
ఆ వాం గ్రావాణో అశ్వినా ధీభిర్ విప్రా అచుచ్యవుః |
నాసత్యా సోమపీతయే నభన్తామ్ అన్యకే సమే || 8-042-04
యథా వామ్ అత్రిర్ అశ్వినా గీర్భిర్ విప్రో అజోహవీత్ |
నాసత్యా సోమపీతయే నభన్తామ్ అన్యకే సమే || 8-042-05
ఏవా వామ్ అహ్వ ఊతయే యథాహువన్త మేధిరాః |
నాసత్యా సోమపీతయే నభన్తామ్ అన్యకే సమే || 8-042-06
