అగ్నిర్ ఉక్థే పురోహితో గ్రావాణో బర్హిర్ అధ్వరే |
ఋచా యామి మరుతో బ్రహ్మణస్ పతిం దేవాఅవో వరేణ్యమ్ || 8-027-01
ఆ పశుం గాసి పృథివీం వనస్పతీన్ ఉషాసా నక్తమ్ ఓషధీః |
విశ్వే చ నో వసవో విశ్వవేదసో ధీనామ్ భూత ప్రావితారః || 8-027-02
ప్ర సూ న ఏత్వ్ అధ్వరో ऽగ్నా దేవేషు పూర్వ్యః |
ఆదిత్యేషు ప్ర వరుణే ధృతవ్రతే మరుత్సు విశ్వభానుషు || 8-027-03
విశ్వే హి ష్మా మనవే విశ్వవేదసో భువన్ వృధే రిశాదసః |
అరిష్టేభిః పాయుభిర్ విశ్వవేదసో యన్తా నో ऽవృకం ఛర్దిః || 8-027-04
ఆ నో అద్య సమనసో గన్తా విశ్వే సజోషసః |
ఋచా గిరా మరుతో దేవ్య్ అదితే సదనే పస్త్యే మహి || 8-027-05
అభి ప్రియా మరుతో యా వో అశ్వ్యా హవ్యా మిత్ర ప్రయాథన |
ఆ బర్హిర్ ఇన్ద్రో వరుణస్ తురా నర ఆదిత్యాసః సదన్తు నః || 8-027-06
వయం వో వృక్తబర్హిషో హితప్రయస ఆనుషక్ |
సుతసోమాసో వరుణ హవామహే మనుష్వద్ ఇద్ధాగ్నయః || 8-027-07
ఆ ప్ర యాత మరుతో విష్ణో అశ్వినా పూషన్ మాకీనయా ధియా |
ఇన్ద్ర ఆ యాతు ప్రథమః సనిష్యుభిర్ వృషా యో వృత్రహా గృణే || 8-027-08
వి నో దేవాసో అద్రుహో ऽచ్ఛిద్రం శర్మ యచ్ఛత |
న యద్ దూరాద్ వసవో నూ చిద్ అన్తితో వరూథమ్ ఆదధర్షతి || 8-027-09
అస్తి హి వః సజాత్యం రిశాదసో దేవాసో అస్త్య్ ఆప్యమ్ |
ప్ర ణః పూర్వస్మై సువితాయ వోచత మక్షూ సుమ్నాయ నవ్యసే || 8-027-10
ఇదా హి వ ఉపస్తుతిమ్ ఇదా వామస్య భక్తయే |
ఉప వో విశ్వవేదసో నమస్యుర్ ఆఅసృక్ష్య్ అన్యామ్ ఇవ || 8-027-11
ఉద్ ఉ ష్య వః సవితా సుప్రణీతయో ऽస్థాద్ ఊర్ధ్వో వరేణ్యః |
ని ద్విపాదశ్ చతుష్పాదో అర్థినో ऽవిశ్రన్ పతయిష్ణవః || 8-027-12
దేవం-దేవం వో ऽవసే దేవం-దేవమ్ అభిష్టయే |
దేవం-దేవం హువేమ వాజసాతయే గృణన్తో దేవ్యా ధియా || 8-027-13
దేవాసో హి ష్మా మనవే సమన్యవో విశ్వే సాకం సరాతయః |
తే నో అద్య తే అపరం తుచే తు నో భవన్తు వరివోవిదః || 8-027-14
ప్ర వః శంసామ్య్ అద్రుహః సంస్థ ఉపస్తుతీనామ్ |
న తం ధూర్తిర్ వరుణ మిత్ర మర్త్యం యో వో ధామభ్యో ऽవిధత్ || 8-027-15
ప్ర స క్షయం తిరతే వి మహీర్ ఇషో యో వో వరాయ దాశతి |
ప్ర ప్రజాభిర్ జాయతే ధర్మణస్ పర్య్ అరిష్టః సర్వ ఏధతే || 8-027-16
ఋతే స విన్దతే యుధః సుగేభిర్ యాత్య్ అధ్వనః |
అర్యమా మిత్రో వరుణః సరాతయో యం త్రాయన్తే సజోషసః || 8-027-17
అజ్రే చిద్ అస్మై కృణుథా న్యఞ్చనం దుర్గే చిద్ ఆ సుసరణమ్ |
ఏషా చిద్ అస్మాద్ అశనిః పరో ను సాస్రేధన్తీ వి నశ్యతు || 8-027-18
యద్ అద్య సూర్య ఉద్యతి ప్రియక్షత్రా ఋతం దధ |
యన్ నిమ్రుచి ప్రబుధి విశ్వవేదసో యద్ వా మధ్యందినే దివః || 8-027-19
యద్ వాభిపిత్వే అసురా ఋతం యతే ఛర్దిర్ యేమ వి దాశుషే |
వయం తద్ వో వసవో విశ్వవేదస ఉప స్థేయామ మధ్య ఆ || 8-027-20
యద్ అద్య సూర ఉదితే యన్ మధ్యందిన ఆతుచి |
వామం ధత్థ మనవే విశ్వవేదసో జుహ్వానాయ ప్రచేతసే || 8-027-21
వయం తద్ వః సమ్రాజ ఆ వృణీమహే పుత్రో న బహుపాయ్యమ్ |
అశ్యామ తద్ ఆదిత్యా జుహ్వతో హవిర్ యేన వస్యో ऽనశామహై || 8-027-22
