తం గూర్ధయా స్వర్ణరం దేవాసో దేవమ్ అరతిం దధన్విరే |
దేవత్రా హవ్యమ్ ఓహిరే || 8-019-01
విభూతరాతిం విప్ర చిత్రశోచిషమ్ అగ్నిమ్ ఈళిష్వ యన్తురమ్ |
అస్య మేధస్య సోమ్యస్య సోభరే ప్రేమ్ అధ్వరాయ పూర్వ్యమ్ || 8-019-02
యజిష్ఠం త్వా వవృమహే దేవం దేవత్రా హోతారమ్ అమర్త్యమ్ |
అస్య యజ్ఞస్య సుక్రతుమ్ || 8-019-03
ఊర్జో నపాతం సుభగం సుదీదితిమ్ అగ్నిం శ్రేష్ఠశోచిషమ్ |
స నో మిత్రస్య వరుణస్య సో అపామ్ ఆ సుమ్నం యక్షతే దివి || 8-019-04
యః సమిధా య ఆహుతీ యో వేదేన దదాశ మర్తో అగ్నయే |
యో నమసా స్వధ్వరః || 8-019-05
తస్యేద్ అర్వన్తో రంహయన్త ఆశవస్ తస్య ద్యుమ్నితమం యశః |
న తమ్ అంహో దేవకృతం కుతశ్ చన న మర్త్యకృతం నశత్ || 8-019-06
స్వగ్నయో వో అగ్నిభిః స్యామ సూనో సహస ఊర్జామ్ పతే |
సువీరస్ త్వమ్ అస్మయుః || 8-019-07
ప్రశంసమానో అతిథిర్ న మిత్రియో ऽగ్నీ రథో న వేద్యః |
త్వే క్షేమాసో అపి సన్తి సాధవస్ త్వం రాజా రయీణామ్ || 8-019-08
సో అద్ధా దాశ్వధ్వరో ऽగ్నే మర్తః సుభగ స ప్రశంస్యః |
స ధీభిర్ అస్తు సనితా || 8-019-09
యస్య త్వమ్ ఊర్ధ్వో అధ్వరాయ తిష్ఠసి క్షయద్వీరః స సాధతే |
సో అర్వద్భిః సనితా స విపన్యుభిః స శూరైః సనితా కృతమ్ || 8-019-10
యస్యాగ్నిర్ వపుర్ గృహే స్తోమం చనో దధీత విశ్వవార్యః |
హవ్యా వా వేవిషద్ విషః || 8-019-11
విప్రస్య వా స్తువతః సహసో యహో మక్షూతమస్య రాతిషు |
అవోదేవమ్ ఉపరిమర్త్యం కృధి వసో వివిదుషో వచః || 8-019-12
యో అగ్నిం హవ్యదాతిభిర్ నమోభిర్ వా సుదక్షమ్ ఆవివాసతి |
గిరా వాజిరశోచిషమ్ || 8-019-13
సమిధా యో నిశితీ దాశద్ అదితిం ధామభిర్ అస్య మర్త్యః |
విశ్వేత్ స ధీభిః సుభగో జనాఅతి ద్యుమ్నైర్ ఉద్న ఇవ తారిషత్ || 8-019-14
తద్ అగ్నే ద్యుమ్నమ్ ఆ భర యత్ సాసహత్ సదనే కం చిద్ అత్రిణమ్ |
మన్యుం జనస్య దూఢ్యః || 8-019-15
యేన చష్టే వరుణో మిత్రో అర్యమా యేన నాసత్యా భగః |
వయం తత్ తే శవసా గాతువిత్తమా ఇన్ద్రత్వోతా విధేమహి || 8-019-16
తే ఘేద్ అగ్నే స్వాధ్యో యే త్వా విప్ర నిదధిరే నృచక్షసమ్ |
విప్రాసో దేవ సుక్రతుమ్ || 8-019-17
త ఇద్ వేదిం సుభగ త ఆహుతిం తే సోతుం చక్రిరే దివి |
త ఇద్ వాజేభిర్ జిగ్యుర్ మహద్ ధనం యే త్వే కామం న్యేరిరే || 8-019-18
భద్రో నో అగ్నిర్ ఆహుతో భద్రా రాతిః సుభగ భద్రో అధ్వరః |
భద్రా ఉత ప్రశస్తయః || 8-019-19
భద్రమ్ మనః కృణుష్వ వృత్రతూర్యే యేనా సమత్సు సాసహః |
అవ స్థిరా తనుహి భూరి శర్ధతాం వనేమా తే అభిష్టిభిః || 8-019-20
ఈళే గిరా మనుర్హితం యం దేవా దూతమ్ అరతిం న్యేరిరే |
యజిష్ఠం హవ్యవాహనమ్ || 8-019-21
తిగ్మజమ్భాయ తరుణాయ రాజతే ప్రయో గాయస్య్ అగ్నయే |
యః పింశతే సూనృతాభిః సువీర్యమ్ అగ్నిర్ ఘృతేభిర్ ఆహుతః || 8-019-22
యదీ ఘృతేభిర్ ఆహుతో వాశీమ్ అగ్నిర్ భరత ఉచ్ చావ చ |
అసుర ఇవ నిర్ణిజమ్ || 8-019-23
యో హవ్యాన్య్ ఐరయతా మనుర్హితో దేవ ఆసా సుగన్ధినా |
వివాసతే వార్యాణి స్వధ్వరో హోతా దేవో అమర్త్యః || 8-019-24
యద్ అగ్నే మర్త్యస్ త్వం స్యామ్ అహమ్ మిత్రమహో అమర్త్యః |
సహసః సూనవ్ ఆహుత || 8-019-25
న త్వా రాసీయాభిశస్తయే వసో న పాపత్వాయ సన్త్య |
న మే స్తోతామతీవా న దుర్హితః స్యాద్ అగ్నే న పాపయా || 8-019-26
పితుర్ న పుత్రః సుభృతో దురోణ ఆ దేవాఏతు ప్ర ణో హవిః || 8-019-27
తవాహమ్ అగ్న ఊతిభిర్ నేదిష్ఠాభిః సచేయ జోషమ్ ఆ వసో |
సదా దేవస్య మర్త్యః || 8-019-28
తవ క్రత్వా సనేయం తవ రాతిభిర్ అగ్నే తవ ప్రశస్తిభిః |
త్వామ్ ఇద్ ఆహుః ప్రమతిం వసో మమాగ్నే హర్షస్వ దాతవే || 8-019-29
ప్ర సో అగ్నే తవోతిభిః సువీరాభిస్ తిరతే వాజభర్మభిః |
యస్య త్వం సఖ్యమ్ ఆవరః || 8-019-30
తవ ద్రప్సో నీలవాన్ వాశ ఋత్వియ ఇన్ధానః సిష్ణవ్ ఆ దదే |
త్వమ్ మహీనామ్ ఉషసామ్ అసి ప్రియః క్షపో వస్తుషు రాజసి || 8-019-31
తమ్ ఆగన్మ సోభరయః సహస్రముష్కం స్వభిష్టిమ్ అవసే |
సమ్రాజం త్రాసదస్యవమ్ || 8-019-32
యస్య తే అగ్నే అన్యే అగ్నయ ఉపక్షితో వయా ఇవ |
విపో న ద్యుమ్నా ని యువే జనానాం తవ క్షత్రాణి వర్ధయన్ || 8-019-33
యమ్ ఆదిత్యాసో అద్రుహః పారం నయథ మర్త్యమ్ |
మఘోనాం విశ్వేషాం సుదానవః || 8-019-34
యూయం రాజానః కం చిచ్ చర్షణీసహః క్షయన్తమ్ మానుషాఅను |
వయం తే వో వరుణ మిత్రార్యమన్ స్యామేద్ ఋతస్య రథ్యః || 8-019-35
అదాన్ మే పౌరుకుత్స్యః పఞ్చాశతం త్రసదస్యుర్ వధూనామ్ |
మంహిష్ఠో అర్యః సత్పతిః || 8-019-36
ఉత మే ప్రయియోర్ వయియోః సువాస్త్వా అధి తుగ్వని |
తిసౄణాం సప్తతీనాం శ్యావః ప్రణేతా భువద్ వసుర్ దియానామ్ పతిః || 8-019-37
