ఆ యాహి సుషుమా హి త ఇన్ద్ర సోమమ్ పిబా ఇమమ్ |
ఏదమ్ బర్హిః సదో మమ || 8-017-01
ఆ త్వా బ్రహ్మయుజా హరీ వహతామ్ ఇన్ద్ర కేశినా |
ఉప బ్రహ్మాణి నః శృణు || 8-017-02
బ్రహ్మాణస్ త్వా వయం యుజా సోమపామ్ ఇన్ద్ర సోమినః |
సుతావన్తో హవామహే || 8-017-03
ఆ నో యాహి సుతావతో ऽస్మాకం సుష్టుతీర్ ఉప |
పిబా సు శిప్రిన్న్ అన్ధసః || 8-017-04
ఆ తే సిఞ్చామి కుక్ష్యోర్ అను గాత్రా వి ధావతు |
గృభాయ జిహ్వయా మధు || 8-017-05
స్వాదుష్ టే అస్తు సంసుదే మధుమాన్ తన్వే తవ |
సోమః శమ్ అస్తు తే హృదే || 8-017-06
అయమ్ ఉ త్వా విచర్షణే జనీర్ ఇవాభి సంవృతః |
ప్ర సోమ ఇన్ద్ర సర్పతు || 8-017-07
తువిగ్రీవో వపోదరః సుబాహుర్ అన్ధసో మదే |
ఇన్ద్రో వృత్రాణి జిఘ్నతే || 8-017-08
ఇన్ద్ర ప్రేహి పురస్ త్వం విశ్వస్యేశాన ఓజసా |
వృత్రాణి వృత్రహఞ్ జహి || 8-017-09
దీర్ఘస్ తే అస్త్వ్ అఙ్కుశో యేనా వసు ప్రయచ్ఛసి |
యజమానాయ సున్వతే || 8-017-10
అయం త ఇన్ద్ర సోమో నిపూతో అధి బర్హిషి |
ఏహీమ్ అస్య ద్రవా పిబ || 8-017-11
శాచిగో శాచిపూజనాయం రణాయ తే సుతః |
ఆఖణ్డల ప్ర హూయసే || 8-017-12
యస్ తే శృఙ్గవృషో నపాత్ ప్రణపాత్ కుణ్డపాయ్యః |
న్య్ అస్మిన్ దధ్ర ఆ మనః || 8-017-13
వాస్తోష్ పతే ధ్రువా స్థూణాంసత్రం సోమ్యానామ్ |
ద్రప్సో భేత్తా పురాం శశ్వతీనామ్ ఇన్ద్రో మునీనాం సఖా || 8-017-14
పృదాకుసానుర్ యజతో గవేషణ ఏకః సన్న్ అభి భూయసః |
భూర్ణిమ్ అశ్వం నయత్ తుజా పురో గృభేన్ద్రం సోమస్య పీతయే || 8-017-15
